Qudratillo Abduqahhorov AQShda "Elite pro boxing" zalining eng mashhur vakili bilan sparring janglar o‘tkazdi

Yarim o‘rta vazn (66.6 kg) toifasida faoliyat yuritib kelayotgan professional bokschimiz Qudratillo Abduqahhorov ayni vaqtda AQShda mashg‘ulotlarini davom ettirgan holda, navbatdagi jangiga hozirlik ko‘rmoqda. Kaliforniya shtati Los-Anjeles shahrida bo‘lib turgan hamyurtimizning mashg‘ulotlar jarayoni va ehtimoliy jangi haqidagi fikrlari bilan qiziqdik.

- AQShda juda mashhur boks klublari bor. Ehtimol, siz o‘shalardan birida tayyorgarlik ko‘rayotgandirsiz?

- Mashg‘ulotlarni "Elite pro boxing" zalida olib bormoqdaman. Albatta, bu zalning ham o‘ziga yarasha nufuzi bor.

-Avvalgi tashriflaringizda ham bu zalda bo‘lganmisiz?

- Keyta Obara bilan jangimga ham shu erda tayyorgarlik ko‘rgandim.

- Ushbu zalning eng mashhur vakili kim?

- To‘g‘risi, sparring uchun juda ko‘p yulduzlar tashrif buyuradi. Lekin rostmana shu dargohni tarbiyalanuvchilarini aytadigan bo‘lsak, ular orasida birinchi o‘rta (69.8 kg) vazn toifasi vakili Brendon Adams (22-3,14 KO) eng mashhuri sanaladi. 

- Balki, u bilan sparringni imkoni bo‘lgandir?

- U 3 dekabr kuni navbatdagi jangini o‘tkazdi va nokaut bilan g‘alaba qozondi. Jangdan avval unga aynan, men sparring sherik bo‘lib, yordam berdim. 3 marotaba to‘rt raunddan ishladik. 

- Sparring qanday bo‘ldi? Har holda bir vazn yuqori toifadagi raqib, qolaversa ,u divizionda o‘z o‘rniga ega bokschi sanaladi. U bilan ishlash qiyin bo‘lmadimi?

- Yo‘q. Bunday vazndagi bokschilar bilan ko‘p ishlaganman. To‘g‘risi, hayron qoldirdi, deb ayta olmayman. Maqtanish niyatidan yiroqman. Shunchaki, undan ham kuchli bokschilar bilan ishlaganim uchun bu fikrni bildiryapman. O‘z o‘rnida u jangdan kelib, men bilan ishlagani maqul kelgani va juda katta foyda bo‘lganini aytib, minnatdorchilik bildirdi. 

- O‘zingizning jangingiz borasida biror yangilik ayta olasizmi?

- Hozircha biror aniq ma’lumot ayta olmayman. Biroq tez kunlarda yangilik bo‘lib qoladi. 

- Barcha boks muxlislari ham sizning jangingizni orziqib kutishmoqda va o‘z o‘rnida sizga ishonchlari ham yuqori...

- Buni his qilib turibman. Shu o‘rnida qo‘llab -quvatlayotgan va ishonch bildirayotgan barchaga o‘z minnatdorchiligimni bildiraman. Chiroyli g‘alabalar bilan ularning ishonchini oqlashga harakat qilaman.

-Bu borada sizga omad tilaymiz!

- Rahmat!