Қудратилло ва Азизбек эртага навбатдаги нокаут учун рингга чиқади
10 февраль куни Сингапурда ташкил этиладиган профессионал бокс кечасида икки енгилмас боксчимиз – Қудратилло Абдуқаҳҳоров (9-0-0, 6 КО) ва Азизбек Абдуғофуров (4-0-0, 4 КО) рингга чиқади.
Еттита учрашувдан иборат бўлган профессионал бокс кечасининг асосий жангида Азизбек Абдуғофуров WBC йўналиши бўйича Asian Boxing Council middleweight title - Осиё чемпионлик камарини Сиримонгкол Эамтуамдан ҳимоя қилади. Таиландлик боксчи профессионал рингда 93 та жанг ўтказиб, 91 марта зафар қучган, шулардан 57 тасида рақибларини муддатидан олдин енгган.
Профессионал боксда мағлубиятсиз иштирок этаётган ҳамюртимиз Қудратилло Абдуқаҳҳоров фаолиятидаги ўнинчи жангини Танзания рейтингида биринчи ўринни эгаллаб турган Идд Пиаларига (17-2-0, 12 КО) қарши ўтказади.
Бу жанг ҳамюртимиз учун чемпионлик баҳсига тайёргарлик вазифасини ўтайди. Шу йилнинг 25 март куни Қудратилла зимбабвелик Африка чемпиони Чарльз Манючига қарши WBC Silver – кумуш камари учун жанг қилади.
Бугун Сингапурда боксчилар торозига чиқишди ва эртанг жанг олдидан "кўз уриштириш" маросимида қатнашишди.
Қудратиллонинг вазни 66,5 килограмм тош босган бўлса, Азизбекнинг оғирлиги 72,1 килограммни ташкил қилди.
- Эртанги жангга тайёрмиз, - деди Қудратилло Абдуқаҳҳоров SPORTS.uz ахборот портали мухбирига. - Раsибларимиз кучли, жанг мураккаб бўлади. Бироқ, биз фақат ғалаба учун рингга чиқамиз. Мураббий ва мухлислар ишончини оқлаш асосий мақсадимиз деди.
Бўлажак жангда Қудратилло ва Азизбекка ғалаба тилаймиз!
Фикрлар