Руслан Чагаев: Рингда рақибларга раҳм қилинмайди (видео)

SPORTS.uz интернет портали ўзбек боксчилари орасида энг номдор ва ўз вақтида супер оғир вазн тоифасининг WBA чемпионлик камарига эгалик қилиб келган Руслан Чагаев билан суҳбатни эътиборингизга ҳавола этади.

Факт: Руслан Чагаев уч карра Олимпиада чемпиони кубалик Феликс Савонни халқаро турнирларда икки марта мағлуб этган ягона (кубалик бўлмаган – SPORTS.uz) хорижлик боксчи. Биринчи марта Руслан 19 ёшида ўша вақтдаги икки карра Олимпиада чемпионини 14-4 ҳисобида мағлуб этиб, жаҳон чемпионлигини (1997) қўлга киритган. 1999 йилда Пловдивда (Болгария) ўтказилган халқаро боксчилар кубогида яна Савонни 7-2 ҳисобида мағлуб қилади. Савон эса ўша йилги жаҳон чемпионатида Чагаевдан реванш олишга муваффақ бўлган.

– Ассалому алайкум. Спортни неча ёшдан бошлагансиз ва илк устозингиз ким?

– Ваалайкум ассалом. Боксга умуман, спортга кириб келишим бироз кеч бўлган десам ҳам бўлади. Кўпчилик 6-7 ёшидан шуғуллана бошлаган бўлса, мен 13 ёшда қадам қўйганман. Лекин уни қачон бошлаш эмас, муҳими қийинчиликларига чиқаб, давом эттира олиш ҳам зарур. Илк устозимга келадиган бўлсак, Александр Размахов. У мураббийдан жуда кўп нарсани ўрганганман.

– Спортдаги илк ғалабангизни эслай оласизми ва ҳаваскорлар боксидаги натижаларингиз ҳақида гапириб берсангиз?

1997 йил Будапештда бўлиб ўтган жаҳон чемпионатида оғир вазн тоифасида илк ғалабани қўлга киритганман. Бундан ташқари 2001 йилги дунё биринчилигида ҳам зафар қучганман. Икки марта Осиё чемпиони, бир марта Осиё ўйинларида ғолиб, 2 марта Марказий Осиё чемпиони ҳам бўлганман, бироқ икки марта Олимпия ўйинларида иштирок этган бўлсамда, омадсиз якунланган. Умуман ҳаваскорлар боксида 85 жангдан 82 тасида рақибларни мағлуб қилганман.

Изоҳ: 1997 йилги жаҳон чемпионати олдидан Чагаев 2 та профессионал жанг ўтказади ва ундан чемпионлик тортиб олинади, бироқ бу жанглар кейинчалик кўргазмали дея баҳоланади ҳамда чемпионлик қайтарилади.

– Ёшлигингизда рингдан ташқарида ҳам муштлашган ҳолатлар бўлганми?

(Кулади). Ёшликда болалар баъзан уришиб туришади. Бу менимча ҳаммада бўлса керак. Менда ҳам шундай воқеалар бўлган, лекин уларни жиддий деб бўлмайди.

– Руҳий тушкунликка тушган ҳолатларингиз ҳам бўлганми?

Бу айниқса спортчиларда кўп учрайди. Сабаби йиллар давомида мағлубиятга учрамайди, бироқ биргина муҳим палладаги мағлубият қаттиқ таъсир қилади. Буни енгиш учун спортчига кучли ирода керак. Менда ҳам бўлган, аммо уларни осонгина енгиб ўтишнинг уддасидан чиққанман.

– Профессионал фаолиятингиз қачон бошлагансиз?

– 2001 йилги жаҳон чемпионатидан (Белфаст, Шимолий Ирландия) сўнг профессионал фаолиятимни бошлашга қарор қилдим. Бошланиши ва бундаги жуда яхши бўлди. 2006 йилдан бошлаб чемпионлик камарларига (WBA Inter-Continental ва WBO Inter-Continental) эга чиқдим. 2007 йил апрелда эса мен учун унутилмас кунлардан бири бўлган. Ўшанда Николай Валуев билан жанг қилиб, фаолиятимдаги илк чемпионлик камари – WBAни қўлга киритганман. Бунга кўпчилик ишонмаган эди.


– Сиз орзу қилган чемпионлик камарлари қайси эди?

– Боксчилар айнан битта камарни қўлга киритаман дейишмайди одатда. Шулар сингари мен ҳам барча камарларга эгалик қилишни хоҳлаганман, лекин бу жуда мушкул иш. Бунинг уддасидан чиқиш ҳамма боксчиларга ҳам насиб қилавермайди.

– Рингдаги рақибларингизга раҳмингиз келмаганми?

– Умуман спортда кимдир мағлуб, кимдир ғолиб бўлади. Агар ғолиб бўлмоқчи бўлсанг, раҳм қила олмайсан. Буни ринг деб қўйибди.

– Владимир Кличко ва Александр Поветкинга қарши жангларингиз ҳақида тўхталиб ўтсангиз...

– Фаолиятимдаги энг оғир ва муҳим жанглардан бири. Афсуски иккиси ҳам мағлубият билан тугаган. Чемпионлик жанглари эди. Владимир билан бўлган жангда охиригача давом эттира олмаганман. Жангни тўхтатишга мажбур бўлдим. Рақиб яхши тайёргарлик кўрган ва кучли эди. Бундан кейинчалик яна чемпионлик жанглари бўлди ва яна чемпион бўлиш насиб қилган.

Маълумот учун: Руслан Чагаев профессионал фаолиятини 2001 йили сентябрда бошлаган. У бутун фаолияти давомида 38 та жанг ўтказиб, шулардан 34 тасини ғалаба (21 нокаут) билан якунлаган бўлса, 3 мағлубият ва 1 дуранг қайд этган.

– Мағлуб бўлган вақтингизда нималарни ўйлардингиз?

– Одатда ҳеч нарсани ўйлаймасликка ҳаракат қилардим. Фақатгина ўзимга ачинаман. Чунки иложсиз нарсанинг ўзи йўқ. Рақиб ғалаба қозонган бўлса, мен ҳам шу ишни қила олишим мумкин эдику.

– Машҳурлик ҳаётингизни қайси тарафга ўзгартирди?

Мен доимо ўзимни назорат қилиб юраман ва тўғри йўлдан юришга ҳаракат қиламан. Шунинг учун машҳурлик орқали ўзгаришни хоҳламайман.

– Спортдан нима учун кетдингиз?

– Ҳамма нарсанинг ўз вақти бор. Мен бокс билан 25 йилдан ортиқ вақт давомида шуғулланиб келдим. Энди бошқаларга йўл бериши керак. Ҳозирда иқтидорли боксчиларимиз кўп. Худо хоҳласа, яқин вақтларда яна ўзбекистонликлар яна чемпионликларни қўлга киритишади. Улар қайд этаётган натижалар шуни кўрсатмоқда. Уларга бу йўлда чин юракдан омад тилаб қоламан.

Суҳбатингиз учун ташаккур!

Суҳбат @uzsport_com (телеграм) канали билан ҳамкорликда ташкил қилинди.

Фикрлар

Фикр қолдириш учун авторизациядан ўтинг!