Санжарбек Раҳмонов америкалик боксчига қарши рингга чиқадиган бўлди

Ўзбекистонлик профессионал боксчи Санжар Раҳмонов (9-0-1, KO4) ўзининг навбатдаги жангини 27 январ куни ўтказишни режалаштирмоқда. Жанг Лас-Вегасдаги “Sam's Town Hotel & Gambling Hall” аренасида ташкил этилади.

Боксчимиз мазкур жангда америкалик Хийлон Виллиамсга қарши рингга чиқади. Бу боксчи профессионал рингда 21 та жанг ўтказиб, 16 ғалаба (3 нокаут), 4 мағлубият ва 1 дуранг қайд этган. Виллиамс сўнги ўтказилган 5 жангнинг учтасида мағлуб бўлган бўлса, 1 дуранг ва 1 марта зафар қучган. Охирги марта ўтган йилнинг февралида рингга чиқиб, ҳамюрти Дарвин Прайсга (13-0-0, КО6) имкониятни бой берган.

Санжарбек эса охирги жангини ўтган йилнинг 21 октябрида америкалик Жон Далпердангга қарши ўтказиб, 8 раунд давом этган қарама-қаршиликда у рақибини очколар бўйича мағлуб этган эди.

Санжар Раҳмонов профессионал фаолиятини 2015 йил июн ойида бошлаган бўлиб, шу вақтга қадар 10 жанг ўтказган ва шулардан 9 тасини ғалаба (4 нокаут) ҳамда 1 дуранг қайд этган.