"Ливерпуль" Салоҳни 200 млн фунтга сотмади

“Ливерпуль” раҳбарияти жамоа ҳужумчиси Муҳаммад Салоҳни “Реал”га сотишдан бош тортди, дея хабар беради Daily Mail нашри.

Манбада ёзилишича, инглиз клуби мадридликларнинг мисрлик футболчи бўйича юборган 200 миллион фунт (228,8 миллион евро) таклифини рад қилган.

Аввалроқ “қироллик клуби” президенти Флорентино Перес жамоа ҳужум чизиғини кучайтириш мақсадида Салоҳ ва ПСЖ етакчиси Неймар билан шартнома имзолашни мақсад қилганини маълум қилган эди. Шунингдек, ОАВда “Реал”нинг “Тоттенхэм” ҳужумчиси Харри Кейнга ҳам қизиқиш билдираётганлиги хабар қилинмоқда.

Ҳозирда “Реал” “қизиллар” билан музокараларда Салоҳнинг шартномасида белгиланмаган товон пули борасида қийинчиликка дуч келмоқда. Бундан ташқари мерсисайдликлар устози Юрген Клопп жамоада нафақат 25 ёшли мисрлик футболчи, балки унинг ҳужумдаги шериги Роберто Фирминони олиб қолмоқчи.

Эслатиб ўтамиз, 2017/18 мавсумда Салоҳ 47 ўйин ўтказиб, 43 голга муаллифлик қилган. Унинг ўртача самарадорлиги ҳар бир ўйинда - 0,91 голга тўғри келмоқда. У “Ливерпуль” сафида 2017 йилдан бери тўп суриб келади. Шартномаси 2020/21 мавсум охирига қадар мўлжалланган.

transfermarkt.de маълумотларига кўра, Салоҳнинг трансфер нархи 80 миллион евро (70 миллион фунт)ни ташқил қилмоқда. “Қизиллар” бу футболчини ўтган йили ёзда “Рома”дан 42 миллион евро (36,7 миллион фунт)га харид қилган.