"Навбаҳор" Черногория терма жамоаси форварди билан шартнома имзолади

Жорий мавсум ўз олдига юксак мақсадларни қўйган Наманганнинг “Навбаҳор” клуби айни пайтдаги трансфер ойнасидан самарали тарзда фойдаланишга ҳаракат қилмоқда.

Клуб расмий сайтининг хабар беришича “лочинлар” кеча ўз сафига черногориялик ҳужумчи Дарко Никачни қўшиб олишди. У 1990 йилнинг 15 сентябрида таваллуд топган. Ўтган мавсумни Подгорицанинг “Будучность” жамоасида ўтказиб, миллий чемпионат баҳсларида 9та, мамлакат кубоги ўйинларида 3та – жами 12та гол урган. “Будучность” клуби ўтган мавсумда 2-ўринни қўлга киритиб, кумуш медаль соҳибига айланган. Ундан олдинги мавсумда эса мазкур жамоа чемпион бўлган.

Қайд этиш лозимки, Дарко Никач Черногория терма жамоаси аъзоси ҳисобланади. "Навбаҳор"нинг янги легионери 30-рақам остида тўп суради.