Қудратилло африкалик нокаутчига қарши рингга чиқадиган бўлди

 

Профессионал боксда мағлубиятсиз иштирок этаётган ҳамюртимиз Қудратилло Абдуқаҳҳоров фаолиятидаги ўнинчи жангини 10 февраль куни Сингапурда ўтказади.

Дастлаб, Қудратилло Халқаро бокс ташкилоти - IBO йўналиши бўйича жаҳон чемпиони, жанубий африкалик Тсико Муловедзи (11-7-3, 6 КО) рингга чиқиши эълон қилинганди. Бироқ, кейинчалик рақиб Қудратиллога қарши рингга чиқмаслигини билдирди.

Ташкилотчилар Тсико Муловедзининг ўрнига украиналик Виктор Плотников (34-4-0, 16КО) рингга чиқишини маълум қилишди. Лекин жангга бир неча кун қолганида Виктор Плотников виза муаммоси туфайли Сингапурга келолмайдиган бўлди.

Қудратилло Абдақаҳҳоровнинг мураббийи Илгар Алиевнинг SPORTS.uz ахборот порталига маълум қилишича, жанг ташкилотчилари ҳамюртимизнинг навбатдаги рақиби Танзания рейтингида биринчи ўринни эгаллаб турган Идд Пиалари (17-2-0, 12КО) бўлишини эълон қилишди.

- Яна рақиб ўзгарди, - деди Қудратилло Абдуқаҳҳоров SPORTS.uz ахборот порталига. - Лекин бунинг унчалик аҳамияти йўқ. Мен учун асосий жанг 25 март куни зимбабвелик Африка чемпиони Чарльз Манючига қарши WBC Silver – кумуш камари учун бўлади. 10 февралдаги беллашув эса бўлажак жангга тайёргарлик вазифасини ўтайди.

Идд Пиалари профессионал боксчилик фаолиятини 2009 йили бошлаган. Ўтган йили бу боксчи Universal Boxing Organization (UBO) - Универсал бокс ташкилоти йўналиши бўйича Африка чемпионлик камарини қўлга киритди. Мутахассислар бу боксчининг ўта кучли зарбага эга эканини таъкидлашмоқда.

Бўлажак жангда Қудратиллога ғалаба тилаймиз!

SPORTS.uz

Фикрлар

Фикр қолдириш учун авторизациядан ўтинг!