"Реал" Испания чемпионатини тарк этиш пайига тушди
"Реал" клуби президенти Флорентино Перес Ла лига ташкилотчиларини "Барселона"га ён босаётганида айблаб, миллий чемпионатдан чиқиб кетишни режалаштираётганини маълум қилди.
Мадрид клуби тақвимдаги ўзгаришлар туфайли мавсумнинг ҳал қилувчи қисмида "Барселона"га қараганда иккита учрашув кўп ўтказишга мажбур бўлмоқда. "Реал" клублар ўртасидаги жаҳон чемпионатида иштирок этгани боис қолган жамоалардан бир ўйин кам ўтказган эди. Ўтган турда эса "Сельта" майдонидаги ўйин табиий офат туфайли Вигодаги стадионга зарар етгани боис яна кечиктириладиган бўлди.
Тақвимдаги ўзгаришлар "Реал"га босим кучайишига сабаб бўлаётганини эътироф этган Флорентино Перес "Кўҳна қитъа"нинг энг зўр жамоалари қатнашадиган Европа Суперлигасини ташкил этишда жонбозлик кўрсатиши ва ўша турнирда қатнашиш ҳақида бош қотирмоқда.
Европанинг етакчи клублари минтақавий Суперлига тузиш лойиҳасини 1998 йилдан буён муҳокама қилмоқда. Янги лига тузиш бўйича муҳокама жараёнида "Реал"дан ташқари, "Барселона", "Бавария", "Ювентус", "Пари Сен-Жермен", "Челси" и "Манчестер Юнайтед" қатнашган.
Бироқ, УЕФА бу турнирда қатнашадиган жамоалар Еврокубокларда иштирок этишдан мосуво бўлишини таъкидлаб келади. Суперлиганинг дастлабки варианти мавсум олди турнири сифатида International Champions Cup номи остида Австралия, Осиё, Европа ва Шимолий Америкада ташкил этилди.
International Champions Cup мусобақаларида "Ювентус", "Атлетико", "Мельбурн", "Тоттенхэм", "Боруссия" (Дортмунд), "Манчестер Сити", "Манчестер Юнайтед", "Пари Сен-Жермен", "Ливерпуль", "Челси", "Реал", "Барселона", "Бавария", "Интер", "Милан", "Лестер" ва "Селтик" каби жамоалар тўп сурди.
Фикрлар