"Реал" ёзда "Манчестер Сити" етакчиларини харид қилмоқчи

Мадриднинг “Реал” клуби раҳбарияти “Манчестер Сити” жамоасининг икки нафар футболчиси Кевин де Брейне ва Лерой Сане билан шартнома имзоламоқчи, дея хабар беради Manchester Evening News нашри.

Манбада ёзилишича, “қироллик клуби” “шаҳарликлар”нинг яна икки нафар ўйинчиси – Раҳим Стерлинг ва Жон Стоунсга қизиқиш билдирмоқда.

Маълум бўлишича, мадридликлар бельгиялик футболчи учун 175 миллион фунт (200 миллион евро) беришга тайёр. Бироқ бунга де Брейненинг “Манчестер Сити” билан 2023 йилгача мўлжалланган янги шартномаси тўсқинлик қилиши мумкин. Бу шартномага кўра, ярим ҳимоячининг ҳафталик маоши 275 минг фунт (14,3 миллион фунт – йилига)ни ташкил этади.

Сане учун “Реал” 70 миллион фунт (80 миллион евро) бермоқчи, аммо CIES Football Observatory тадқиқот компанияси бўйича германиялик ҳужумчининг трансфер нархи 132 миллион фунт (151 миллион евро)ни ташкил қилади. Манбанинг хабар беришича, амалдаги Англия чемпиони бу футболчини қўйиб юбормоқчи эмас.

Стерлинг эса “Манчестер Сити” билан ёзда 2019/20 йилгача мўлжалланган шартномасини узайтиришни режалаштирмоқда.

Стоунсга келадиган бўлсак, инглиз нашрлари рўйхатдаги “энг ҳайратланарли номзод” дея баҳоламоқда. Сабаби бу футболчи бу мавсум асосий таркибдаги ўрнини йўқотиб бўлган. Бунга унинг жароҳатлари ва яхши спорт формасида бўлмаганлиги айтилмоқда. Манбада ёзилишича, “Реал” бу футболчидан мавсумнинг биринчи ярмида фойдаланмоқчи.

Фикрлар

Фикр қолдириш учун авторизациядан ўтинг!