"Sport" телеканали Ўзбекистон кубоги 1/8 финал босқичидаги 4 ўйинни жонли эфирда кўрсатади

Ўзбекистон Кубогининг нимчорак финалидан жой олган учрашувларнинг вақти аниқ бўлгани борасида хабар берган эдик. Эътиборлиси, "Sport" телеканали ушбу босқичдан ўрин олган 4 та беллашувни жонлий эфирда намойиш этишни режалаштирган.

Жумладан, канал Про-лиганинг “Ифтихор” ҳамда “Динамо” жамоалари иштирокидаги ўйинларга эътибор қаратишни лозим деб топди ва кубок доирасидаги бу икки жамоа ўйинларини 17:00 га қўйишни сўради.

Шу орқали футбол мухлислари Ёшлар Иттифоқи асосида тузилган “Ифтихор” клуби ҳақида маълумотга эга бўлиб олади. Айни вақтда мазкур жамоа томонидан қурилаётган стадионда таъмирлаш ишлари якунига етмаган. Етган тақдирда ҳам, уни ИИВ ҳамда ПФЛ комиссиялари алоҳида-алоҳида ўрганиб чиқиши керак бўлади. Шунингдек, янги стадиондан трансляция уюштириш имкониятини МТРК вакиллари текширувдан ўтказиши лозим. Бу ишларни 29 май санасигача якунлаш учун ҳозир анча кеч. Шундан келиб чиқиб, “Ифтихор” — “Пахтакор” ўйини Олтиариқдаги Суперлига талабига жавоб бермайдиган стадионда эмас, балки Фарғонадаги “Истиқлол” стадионида бўлиб ўтади.

Шунингдек, Самарқанднинг “Динамо” клуби “Қизилқум”га қарши кураш олиб боради. Самарқанд шаҳри аҳолиси катта футболни соғиниб қолгани сир эмас. Айни вақтда “Динамо”нинг Про-Лигадаги иштирокини ҳам қониқарли деб бўлмайди. Шундан келиб чиқиб, “Спорт” телеканали Самарқанддаги футбол учрашувини ҳам жонли намойиш этиш истагини билдирди. Бу ўйин ҳам ифторлик вақтига қадар якунига етиб улгуради.

Ўзбекистон Кубогининг қолган учрашувлари худди Суперлигадаги ҳолат каби старт олади. Яъни, улардаги танаффус ифторлик вақтига тўғри келади. Шундай қилиб, “Спорт” телеканали 1/8 финал босқичининг жами 4 та учрашувини жонли кўрсатади.

Ўзбекистон Кубоги. 1/8 финал

29 май (сешанба)

17:00  “Ифтихор” — “Пахтакор” (live)

19:02  “Бунёдкор” — “Сўғдиёна” (live)

30 май (чоршанба)

17:00  “Динамо” — “Қизилқум” (live)

19:03  АГМК — “Насаф” (live).

1/8 финал босқичи ғолиблари фақатгина битта ўйин орқали аниқланади. Яъни, учрашув асосий ва қўшимча дақиқалари дуранг билан якунига етса, пенальтилар сериясига навбат берилади.

Мазкур ҳолат жонли эфир режаларига тегишли тартибда ўзгартириш киритиши мумкин. Агар биринчи ўйинлар қўшимча дақиқаларга қадар чўзилса, у ҳолда “Спорт” телеканали вазиятдан келиб чиқиб иш кўради.