Суперлига ўйинларига тушиб, ЖЧ-2018 нинг бепул чипталарини қўлга киритиш мумкин

Аввал хабар берилганидек, Ўзбекистон Миллий олимпия қўмитаси президенти ва Ўзбекистон футбол федерацияси 1-вице-президенти Умид Аҳмаджонов ФИФА президенти Жанни Инфантино билан учрашув давомида Ўзбекистонда футболни янги босқичга олиб чиқиш, ёш авлод орасида футболни янада оммавийлаштириш, Ўзбекистондаги футбол мухлисларига Жаҳон футболи юлдузлари иштирокидаги учрашувларни бевосита стадионлардан томоша қилиш имкониятини тақдим этиш борасида ФИФАнинг амалий ёрдам беришини сўраганди. 

Шунга асосан ФИФА президенти Жанни Инфантино ўзбекистонлик футбол мухлислари учун шу йилнинг 14 июнь-15 июль кунлари Россияда бўладиган Жаҳон чемпионати учун чипталар тақдим этишга қарор қилди. Эндиликда ўзбекистонлик футбол ишқибозлари ёзда бўлиб ўтадиган мундиал баҳсларини бевосита стадионлардан томоша қилиб, Жаҳон футболи юлдузлари иштирокидаги баҳслардан баҳра олишлари мумкин бўлади. Бу ҳақда ЎФА расмий сайти хабар бермоқда.

Чипталар сони чекланган бўлиб, фақатгина энг фаол футбол мухлисларига тақдим қилинади. Бунинг учун Суперлига баҳсларидан ўрин олган учрашувларга ташриф буюринг, ўзингизнинг севимли жамоангизни бевосита стадиондан туриб қўллаб-қувватланг ва Жаҳон чемпионати ўйинлари учун чипталарни қўлга киритинг!

Энг фаол мухлисларга Жаҳон чемпионати чипталари қай тартибда тақдим қилиниши ҳақида кейинроқ батафсил маълумот берилади. 

Фикрлар

Фикр қолдириш учун авторизациядан ўтинг!