Учқун Қобилов: Ғалаба учун “Динамо”га омад етишмади

Про-Лига 1-тури доирасидаги «Норин» - «Динамо» (0:0) ўйинидан кейин самарқандликлар катта мураббийи Учқун Қобилов учрашувдан кейинги фикрларини билдирди. Бу ҳақда клуб матбуот хизмати хабар бермоқда.

Бугун жамоа бир очко йўқотдими ёки қўлга киритдими?

- Шубҳасиз, очко йўқотдик. Бугун фақат ғалаба илинжида келгандик. Аммо, тан олайлик “Норин” ҳам ҳурматга сазовор клуб эканлигини яна бир карра исботлади. Бу жамоа таркиби 2-3 йилдан буён деярли ўзгармаяпти. Мавсум олди йиғинда ҳам “Норин” “Андижон” ва “Сурхон”ни мағлуб этганди. Шундай экан, “Норин” жамоасини кучсиз жамоа деб бўлмайди. “Динамо” Олий Лигага йўл олган 2016 йилда ҳам “Норин” бизга асосий рақобатчи бўлганди. Ўшанда ҳам мавсумни яхши бошлай олмаган бўлсакда, якунда Олий Лигага чиққандик.

Бугун ғалаба учун жамоага нима етишмади?

- Бу баҳс мавсумнинг бошланиши эканлигини инобатга олиш керак. Қолаверса, ўйин давомида вазиятлардан фойдалана олмадик. Иккинчи бўлимда ҳужумкорликни оширдик, Амиржон Сафаровда яхши имконият бўлганди, аммо омад биздан юз ўгирди. Жамоамиз ўйини ёмон чиқмади, фақат бугун рақиб ҳам яхши ўйнади, қолаверса ғалаба учун омадимиз ҳам келмади.

“Динамо” энди 3-турда “Машъал”га қарши майдонга тушади...

- Олдимизда кубок доирасидаги “Хотира-79” ва “Машъал” билан баҳс турибди. 2-турда дам олишимиз боис, хатоларни таҳлил қилиб, ушбу баҳсларга жиддий тайёргарлик кўрамиз. Про-Лига янги форматида ҳеч бир жамоага осон бўлмайди. Мақсадимиз Суперлигага чиқиш, қўл остимизда яхши жамоа йиғилган. Шундай экан, мавсум эса энди бошланди, курашишда давом этамиз.

Фикрлар

Фикр қолдириш учун авторизациядан ўтинг!