"Атлетико" ҳужумчиси Россияга йўл олиши мумкин

Санкт-Петербургнинг “Зенит” клуби “Атлетико” ярим ҳимоячиси Николас Гайтаннинг трансфери борасида мадридликлар билан музокараларни бошлади.

TyC Sports тарқатган хабарга кўра “матрасчилар” 29 ёшли футболчини 25 млн еврога сотишни режалаштиришмоқда. Боиси, улар Гайтан учун 2016 йил “Бенфика”га айнан шунча маблағ тўлашган эди.

Аргентиналик журналист Луис Фрегосси тарқатган хабарга қараганда Гайтан аллақачон “Зенит”га ўтиши учун “Атлетико” билан келишиб олган.

Эслатиб ўтамиз, питерликлар учун бу Мадрид клубидан сотиб олинган биринчи аргентиналик футболчи эмас. Боиси, улар ўтган йилнинг ёзида Матиас Краневиттерни ҳам айнан “Атлетико”дан сотиб олишган эди.