Мерганларимиз “Олтин мерган” халқаро турнирида юртимиз шарафини ҳимоя қилишади

Ўзбекистон ўқ отиш спорти федерациясининг 2018 йилги мусобақалари тақвимига кирувчи турнир халқаро талаблар асосида, янги, замонавий баҳолаш механизмларидан фойданилган ҳолда ташкил этилмоқда. Натижада феврал, март ойларида бўлиб ўтган Ўзбекистон кубоги ва чемпионатида юртимиз шарафини халқаро мусобақаларда ҳимоя қиладиган энг сара мерганларимиз саралаб олинди.

“Олтин мерган” халқаро турнирида юртимиз шарафини кўп карра Ўзбекистон чемпиони, Осиё чемпионати, Осиё ўйинлари ғолиби, Олимпия ўйинлари иштирокчиси Вадим Скороваров, кўп карра Ўзбекистон чемпиони, қатор халқаро турнирлар ғолибаси, 2017 йил Баку (Озорбайжон) шаҳрида ўтказилган IV Ислом бирдамлик ўйинларида – 3 ўринни эгаллаган Сакина Мамедова, кўп карра Ўзбекистон чемпиони ва халқаро турнирлар ғолиблари  Елена Кузнецова, Алина Тарасова, Саидхон Сайфуддинов, Роман Голошапов, Артем Чернышевлар, бундан ташқари, умидли ёшларимиз Олима Комилова, Зайнаб Пардабоевалар ҳам ҳимоя қилишади.

2018 йил бошидан йиллик тақвимга киритилган мусобақаларнинг янада қизғин ва муросасиз ўтишига сабаб натижаларига кўра, энг кучли учликка кирган спортчиларни терма жамоага саралаб олиниши бўлди. Улар олдинги йилларда терма жамоа таркибида бўлганми ёки илк бора Ўзбекистон чемпионатида иштирок этиб ғолиб бўлдими, бунинг фарқи йўқ. Айни пайтда оптимал формадами, у халқаро мусобақаларда юртимиз шарафини ҳимоя қилишга муносиб. Биз айнан шу мезонга асосланиб терма жамоани шакллантирдик. Ўзбекистон миллий олимпия қумитасининг ҳам талаби айнан шундай бўлди, – дейди Ўзбекистон ўқ отиш спорти федерацияси бош котиби Ж.Атабуллаев.

Бугун старт олган халқаро турнир 9 апрелга қадар давом этади.

Фикрлар

Фикр қолдириш учун авторизациядан ўтинг!