Адвокат: Голландия қўлидан келган барча ишни қилди

Голландия терма жамоаси бош мураббийи Дик Адвокат жамоасининг нега мундиалга чиқа олмагани ҳақида гапириб ўтди.

“Футболчиларнинг иштиёқи нафақат ўтган ўйинларда, балки мана шу ўйинда ҳам кўринди. Биз плей-оффга чиқишимиз учун яна 5та гол уришимиз керак эди, бироқ ҳисоб 2:0лигича қолди.

Айтишим лозимки, Швеция ўйин давомида умуман ҳужум қилмади. Улар шунчаки ҳимояланишди. Голландия эса қўлидан келган барча ишни қилди”, - дейди Адвокат.

Эслатиб ўтамиз, саралашнинг "А" гуруҳида кураш олиб борган Голландия терма жамоаси якунда 19 очко билан 3-ўринни эгаллади ва жаҳон чемпионати йўлланмасидан мосуво бўлди.