Александр Хомяков: "Пахтакор" ҳақли равишда ғалабани қўлга киритди

Бугун Олий лига 19-турининг қолдирилган учрашувлари бўлиб ўтди. "Пахтакор" майдонига сафар қилган "Машъал" вакиллари 1-3 ҳисобидаги мағлубиятни қабул қилиб олишди.

Ушбу учрашувдан сўнг ташкил этилган матбуот анжуманида “Машаъл” устози Александр Хомяков ўйин ҳақидаги фикрларини билдириб ўтди.

- Бугунги баҳсда мезбонлар биздан кўра яхшироқ ўйин кўрсата олишди. Тезлик борасида ҳам улар жамоамиздан устун эканликликларини намойиш этишди. Тан олиш керак, “Пахтакор” кучли жамоа эканлигини яна бир бор исботлади. Яхши ташкил этилган жамоавий ўйин олиб борган рақиблар ҳақли равишда ғалаба қозонишди.

Игор Сергеев томонидан киритилган тезкор гол сабаб ўйин тизгинини қўлдан чиқариб қўйдик. Ўтказиб юборилган иккинчи гол эса, аввалдан ишлаб чиқилган тактик режаларимизни бутунлай барбод қилиб юборди.

Учрашув давомида етарлича голли вазиятларни ярата олмадик, ҳатто қарши ҳужум тактикаси ҳам умуман ўзини оқламади. Бир сўз билан айтганда, ўз хатоларимиз сабаб ўйинни бой бериб қўйдик. “Пахтакор”га қарши ўйинларда оддий хатолар ҳам қимматга тушиши табиий хол, албатта.