Анвар Бойназаров 21 апрел куни “EM LEGEND” турнирида рингга чиқади

Кикбоксинг бўйича ҳар йили ўтказилиб келинаётган “EM LEGEND” турнири 21 апрел куни старт олади. “The World Gold Belt” камари учун кечадиган жаҳон чемпионатида дунёнинг энг кучли 32 жангчиси ўзаро рингга чиқишади. Жанг 65 кг вазн тоифасида бўлиб ўтади.

Чемпионат йил бўйи ўтказилади ва босқичма-босқич иштирокчилар сараланади. Унда хитойлик спортчилар билан хориждан ташриф буюрган спортчилар ҳам қатнашади.

21 апрел куни Ченгду шаҳридаги “Emeishan Station” аренасида мусобақанинг “А” гуруҳи иштирокчилари “World Gold Belt” камари учун баҳсларга киришади. Чемпионатнинг илк жангида ўзбекистонлик аралаш яккакураш жанг санъатлари устаси ва икки карра муай тай бўйича жаҳон чемпиони Анвар Бойназаров учинчи марта чемпионлик камари учун юришини бошлайди.

Анвар Бойназаровга илк тўқнашувда хитойлик Пан Цзяюн (35-25, КО10) рақиблик қилади. Гуруҳнинг иккинчи қарама-қаршилигида эса бошқа бир хитойлик спортчи Мэн Годун (22-18, КО7) япониялик Саэки Масая билан куч синашади. Ҳар икки жуфтлик ғолиби финалда учрашади ва ғалаба қозонган спортчи кейинги босқичга йўл олади.

Маълумот учун: “Марказий Осиё шери” номи билан танилган Анвар муай тай билан шуғуллана бошлаган. Кўп йиллар давомида у Таиландда тажрибасини ошириб, ажойиб натижаларга эришган. У биринчилардан бўлиб “энг яхши хорижлик ​​Лумпини жангчиси” деган номга сазовор бўлган. Лумпини муай тай бўйича жаҳоннинг энг номдор стадиони ҳисобланади.

Анвар ушбу камар остида 110 жанг ўтказиб, 88 тасида зафар қучган. 50 тасида эса рақибларини нокаутга учратган. У икки марта “WMY Muay Thai” бўйича жаҳон чемпионига айланган ва бу орада кикбоксинг сир-асрорларини ҳам ўрганиб олади. Айни дамда дунё рейтингида учинчи поғонани эгаллаб турибди.

У рақибларини кучли зарбалари билан мағлуб қилишни яхши ўзлаштирган. Жангда рақибларининг заиф томонини сезган заҳоти ҳал қилувчи зарбани йўллайди. Бироқ ҳамма вақт ҳам Анварга омад кулиб боқавермаган. 2016 йил “EM LEGEND” турнирида ҳамюртимиз ярим финал йўлланмасини қўлга киритади, бироқ виза билан боғлиқ муаммолар сабаб мусобақада қатнашмаган.

Ўтган йили эса иккинчи марта ярим финалга йўл олган спортчимиз таиландлик рақиби Манасга очколар бўйича имкониятни бой беради ва иккинчи марта финалдан қуруқ қолади.