"Арсенал" Санчеснинг ўрнига мексикалик футболчини сотиб олмоқчи

Эйндховеннинг ПСВ клуби чап қанот вингери Ирвинг Лосано "Арсенал"нинг қизиқишлар доирасига кириб қолди. Бу ҳақда Xanianews нашри хабар бермоқда.

Унга кўра "канонирлар" етакчи скаутларидан бири Стив Раули 22 ёшли Мексика терма жамоаси аъзосини кўпдан буён кузатиб келган ва унинг ҳаракатларидан қониқиш ҳосил қилган. Маълумотларга кўра Лондон клуби Лосанони жамоани тарк этиши аниқ бўлиб улгурган Алексис Санчеснинг ўрнига муносиб номзод сифатида кўришмоқда ва уни қишки трансферлар давридаёқ сотиб олишмоқчи.

Ўз навбатида мексикалик иқтидор эгасининг нархи таҳминан 25 миллион еврога баҳоланмоқда. Таъкидлаш лозимки, Лосано ПСВ сафига ўтган мавсум "Пачука" клубидан 10 миллион евро эвазига келиб қўшилган ва голландияликлар билан 2023 йилга қадар шартнома имзолаган эди. 

Маълумот учун, Лосано жорий мавсум Голландия чемпионатида жами 6та учрашувда майдонга тушган ва ўз ҳисобига 6та гол ёздириб қўйишга эришган.