Ахмадалиевни мағлуб этган боксчи жангдан сўнг нималар деди?

Кеча ҳамюртимиз Муроджон Ахмадалиев Гамбургда давом этаётган жаҳон чемпионати илк босқичида қозоғистонлик Қайрат Ералиевга қарши рингга кўтарилди. 56 кг вазн тоифасида кураш олиб борган боксчимиз ҳакамлар хулосасига кўра, 1:4 ҳисобида рақибга мағлуб бўлди ва турнирдаги юришига якун ясади.

Sports.kz интернет нашри эса баҳсдан сўнг Ералиевдан кичик интерьвю олди.

– Қайрат, сиз биринчи жангингиздан сўнг, боксда стабиллик мухим деган эдингиз. Бугун Ахмадалиев Олимпиададаги Ахмадалиевдан кучсизмиди?

– Муроджон Ахмадалиев – яхши боксчи. У мазкур турнирга яхши тайёргарлик билан етиб келди. Кўп нарса ўйиннинг боришига боғлиқ. Баъзи вақтларда омадим келди. Бугун мен яхши жанг қилдим.

–  Бироқ бу билан чекланиб қолмайсиз…

– Албатта. Олдинда қийин баҳслар бор. Тайёргарлик кўришда давом этаман.

– Сиз ўзбек боксчисига қарши қандай тактика қўлладингиз?

– Мен ўзбек боксчисидан тезкорроқ ҳаракат қилишим керак эди ва зарба берганимдан сўнг тўхтаб қолмаслигим зарур эди. Барчаси мен учун яхши якунланганидан хурсандман. Мен олдинги қўлим билан берган барча зарбалар аниқ бўлди. Бу ғалабада мураббийларимнинг хиссаси катта.

– Биринчи раунд сўнггида яхшигина зарбаларни қабул қилиб олдингиз…

Ўзбек боксчиси пайт пойлади. Менимча, раунд сўнггини ўзиники қилмоқчи бўлди. Бироқ мен бунга йўл қўймадим. Биринчи сонияларданоқ ишлаш лозим. Чунки, кейин кеч бўлиши мумкин.

– Олимпиадада сизнинг йўлингизга айнан Муроджон тўғаноқ бўлган эди. Сиз ўша мағлубиятдан қандай хулоса чиқардингиз?

– Ҳар бир турнир – бу янги тажриба ва янги ҳаёт. Мағлубият фақат мени кучли қилади.

– Ахмадалиев бу турнирда ғолиблик учун асосий даъвогарлардан эди. Энди чемпионлик учун сизнинг йўлингизга ким хавф солиши мумкин?

– Кимнидир алохида кўрсатмаган бўлади эдим. Барча баҳсга масъулият билан ёндашиш лозим. Жаҳон чемпионатида кучсизлар бўлмайди.