Бахтиёр Бобоев: Ҳамдамов, Шомуродов ва Шукуровга хориж клублари қизиқишмоқда

Маълумки, 2017 йил юртимизда халқ билан мулоқот ва инсон манфаатлари йили деб эълон қилинган эди. Шу муносабат билан, бугун “Бунёдкор” футбол клуби Осиё Чемпионлар лигаси гуруҳ босқичи бошланиши олдидан мухлислар клуби фаоллари ва ОАВ ходимлари билан мулоқот ўтказди.

Мазкур тадбирда клуб бош директори Бахтиёр Бобоев, бош мураббий Сергей Лушчан, “Бунёдкор” стадиони директори Вахид Закиров ва легионерлар иштирок этишди.

– Биз буни олдиндан режалаштирган эдик. Зеро, жорий йил президентимиз томонидан “халқ билан мулоқот ва инсон манфаатлари йили” деб номланган эди. Шу мақсадда биз мухлислар билан учрашиб, уларнинг таклифларини ўрганиб, фикр алмашишга қарор қилдик. Шунингдек, жамоа ушбу йилда ўз олдига қўйган мақсадлардан бири – ОЧЛ-2017 гуруҳ босқичи йўлланмасини қўлга киритди. Ўйлаймизку, бу шу билан тўхтаб қолмайди, – дея сўз бошлади Бахтиёр Бобоев.

– Сўнгги вақтларда клуб футболчиларига хориждан тушаётган таклифлар ҳақида...

– Жамоамиз иқтидорли футболчилар етишиб чиқмоқда. Айни дамда Достонбек Ҳамдамов, Элдор Шомуродов ва Отабек Шукуровга бир қатор жамоалардан таклиф тушган. Биз улар билан музокаралар давом этмоқда. Биз бунда асосан Европанинг кучли чемпионатларидан тушаётган таклифларга эътибор қаратяпмиз. Агар Европанинг кучлироқ жамоасидан таклиф бўлса, биз бу футболчиларни ушлаб турмайди.

– Академия футболчилари ҳақида...

– Агар бу футболчилар жамоамизни тарк этадиган бўлса, академиямизда улар ўрнини боса оладиган иқтидорли футболчилар бор. Улар ўз устида ишлашда давом этса, аста-секин асосий таркибга кира олишига ишонаман.

– ОЧЛ-2017даги "Бунёдкор"нинг иштироки ҳақида...

– Режаларимиз катта. Бир неча йилдан бери мухлисларни хурсанд қила олмаяпмиз. Аммо бу йил ОЧЛ-2017да гуруҳдан чиқишга харакат қиламиз, – дейди клуби президенти.

Эслатиб ўтамиз, “Бунёдкор” ОЧЛ-2017 “С” гуруҳида “Ал Аҳли”дан ташқари “Зоб Ахан” (Эрон) ва “Ал Айн” (БАА) клублари билан куч синашади. "Қалдирғочлар" дастлабки уй учрашувини 28 февраль куни амирликларга қарши ўтказади.