“Бухоро” янги мавсумда ОЧЛга ҳаракат қилади?!

2015 йилги Ўзбекистон чемпионатида зўрға олий лигада қолишни уддалаган “Бухоро” ортда қолган мавсумда барчанинг олқишига сазовор бўлди.

Бухороликлар олий лига-2016даги иштирокидан ОЧЛга чиқишига умид билан қаралди. Жамоанинг олдига халқаро мусобақаларга йўлланма олиш вазифаси қўйилганда очиғи, кўпчилик ишонқирамай қаради. Аммо “Бухоро” мавсум сўнггида тўртинчи ўринни банд этди. Бундан мухлислар жуда ҳам хурсанд бўлишди. Режалар туза бошлашди. Чунки кейинги мавсумдан умидлари катта эди. Жамоанинг ҳар бир ўйинини бевосита стадиондан кузатадиган кўп сонли мухлислари бор жамоадан янада кўпроғини кутишлари табиий.

Бу йилги натижадан кейингиси янада яхши бўлиши учун мухлислар жамоанинг трансферларига умид билан қарашаётганди. Аммо сўнгги пайтларда “Бухоро”нинг футболчилардан қарзи борлиги ва шунга ўхшаш хабарлар ишқибозларни анча ҳавотирга солмоқда. Бизга маълум бўлишича, ҳозирга келиб клуб мутасаддилари футболчилар билан ҳисоб-китоб ишларини бошлаб юборишган.

Айрим футболчилар жамоани тарк этмоқда. Вадим Чемиртан “Бунёдкор”га ўтиб кетган. Шавкат Муллажонов “Олмалиқ” билан шартнома имзолаган бўлса, Камолиддин Мурзоев ҳам шу жамоа йиғинида иштирок этмоқда. Аммо клубнинг етакчи ўйинчилари ҳозирда “Бухоро” билан бирга. Бир неча кун Малайзиянинг “Т-Тим” жамоаси йиғинида қатнашаётган Шавкат Саломов масаласига шу кунларда ойдинлик киритилади. Азиз Ибрагимов ҳам 15 январда жамоага келиб қўшилиши кутилмоқда. Қолган футболчилар ҳам клубнинг Тошкентдаги йиғинида иштирок этишмоқда.

“Бухоро”нингбу мавсумдаги уй учрашувларига камида 18-20 мингдан ортиқ ишқибоз ташриф буюрди. Бу сўнгги йилларда мухлислар ташрифида кузатилган энг яхши натижадир. Чунки ҳозирги кунда хатто кўплаб ишқибозлари билан ном қозонган водий клублари иштирокидаги ўйинларга ҳам бунчалик кўп мухлислар ташриф буюрмаяпти.

Биз мана шу даражага чиққан “Бухоро”нинг зафарли юришлари бир мавсумга эмас, балки узоқ йилларга мўлжалланган бўлишини ва клуб ўз олдига қўйган ОЧЛ йўлланмасига эга бўлишини истардик. Чунки халқаро ўйинларда стадионларимизнинг тўлиб туриши кимга ҳам ёқмайди дейсиз.