"Челси" Алдервейрелдга ҳафтасига 100 минг фунт маош ваъда қилмоқда

Лондоннинг “Челси” клуби ҳамшаҳари “Тоттенхэм” марказий ҳимоячиси  Тоби Алдервейрелд учун курашга қўшилди.

The Sunday Times нашрининг хабар беришича, “аристократлар” 28 ёшли бельгиялик футболчи “шпорлар” билан янги шартнома имзолашидан авван уни қўлга киритишмоқчи. Айтиш лозимки, агар Алдервейрелд амалдаги жамоаси билан шартномани узайтирса, у ҳолда унинг маоши ҳафтасига 49 минг фунтдан 80 минг фунтга кўтарилиши мумкин. Бу билан у “Тоттенхэм”нинг энг кўп маош олувчи футболчисига айланади.

Ўз навбатида “Челси” бу борада ҳамшаҳарига расмий таклиф билан мурожаат қилган ва футболчининг ўзига ҳафтасига 100 минг фунт маош тўлашга тайёр.

Эслатиб ўтамиз, Алдервейрелдга шунингдек “Манчестер Сити” ҳамда “Интер” каби жамоалардан ҳам жиддий қизиқишлар бўлмоқда.