Эрбернинг эртаги тугади
Нидерландия мезбонлик қилаётган мукофот жамғармаси 1 837 394 АҚШ доллари бўлган "ABN AMRO World Tennis Tournament - 2017" халқаро турнирида сенсацион натижаларни қўлга киритган франциялик Пьер-Юг Эрбернинг эртаги ниҳоясига етди.
Саралаш турниридан асосий тўрга қўшилган Эрбер ярим финалгача бўлган беллашувларда кучли теннисчилар - Фелисьяно Лопесни (Испания) 7:6, 7:6, Евгений Донскойни (Россия, Q) 6:2, 7:6, Доминик Тимни (Австрия, 2) 6:4, 7:6 ҳисобида мағлубиятга учратди.
Финал йўлланмаси учун бўлган баҳсда франциялик теннисчи учинчи рақамда сараланган бельгиялик Давид Гоффенга имкониятни бой берди. Гоффен бу ғалаба орқали келаси ҳафта жаҳон рейтингида илк маротаба кучли ўнликдан жой оладиган бўлди.
Натижалар билан танишинг:
Жо-Вильфрид Цонга (Франция, 6) — Томаш Бердих (Чехия, 4) 6:3 6:4
Давид Гоффен (Бельгия, 3) — Пьер-Юг Эрбер (Франция, Q) 6:1 6:3
Финалда Жо-Вильфрид Цонга (Франция, 6) — Давид Гоффен (Бельгия, 3) баҳсини кўрамиз.
Фикрлар