Ферузбек кумуш камар учун жанг қилади
Россиянинг Челябинск шаҳрида 18 февраль куни ташкил этиладиган профессионал бокс кечасида ўзбекистонлик Ферузбек Йўлдошев WBC йўналиши бўйича Asian Boxing Council Silver lightweight title - Осиё кумуш камари учун мезбонлар вакили Рустам Нугаев билан жанг қилади.
Ферузбек Йўлдошев 2015 йилнинг кузидан буён профессионал рингдаги жангларда қатнашмоқда. Шу кунгача ҳамюртимиз саккизта ғалаба ва битта мағлубият қайд этган.
Ҳамюртимизнинг рақиби Рустам Нугаев эса фаолиятини 2001 йили бошлаган. Кучли зарбага эга боксчи 28 та ғалабадан 18 тасини муддатидан олдин қўлга киритган. Шунингдек, битта жангда дуранг қайд этиб, етти маротаба мағлуб бўлган.
Ўзбекистонлик боксчиларга маъқул келган томони шундаки, Рустам ҳеч қачон ўзбек бокс мактаби вакилларини енголмаган. Дастлаб Зиёиддин Тойғонбоевга, кейин Алишер Раҳимовга имкониятни бой берган.
Шундай бўлса-да, Рустам Нугаев 2016 йилнинг 17 декабрь куни филиппинлик енгилмас нокаутчи Арди Бойосени нокаутга учратиб, Asian Boxing Council Silver камарини қўлга киритди. Энди Руслан бу совринини Ферузбек Йўлдошевдан ҳимоя қилади.
Фикрлар