Головкин ва Альварес жанг олдидан вазн тортишди

Бугун Лас-Вегасда ўрта вазн тоифасининг WBA (Super), WBC, IBF ва IBO камарлари соҳиби қозоғистонлик Геннадий Головкин ва мексикалик Сауль “Канело” Альварес ўртасида вазн тортиш маросими бўлиб ўтди.

Унга кўра, ҳар иккала боксчининг вазни 160 фунтни ташкил қилган. Шундай қилиб, улар келишилган вазнни – 160 фунтгача (72,57 килограмм) қайд этган.

Эслатиб ўтамиз, Головкин ва Альварес жанги 20 минг мухлисга мўлжалланган “T-Mobile” аренасидаги шоунинг асосий жанги ҳисобланади. Тошкент вақтига кўра, у 17 сентябрь куни тонгда бўлиб ўтади.

Бўлажак жангда 35 ёшли Головкин барча чемпионлик камарлари – WBC, WBA (Super), IBF ва IBOни ҳимоя қилади. Ташкилот низосига кўра, 27 ёшли Альварес WBC камарига даъвогарлик қила олмайди.