ЖЧ-2018 чиптаси учун ариза берганлар сони деярли 1 миллионга етди

Аввал хабар берганимиздек ўтган ҳафтада келгуси йил Россия яшил майдонлари мезбонлик қиладиган мундиал чипталари учун онлайн аризалар қабул қилиш бошланган эди.

ФИФАнинг чипталар департаменти бошлиғи Фальк Эллернинг журналистларга айтишича ўтган вақт давомида дунёнинг барча бурчакларидан 1 миллионга яқин ариза келиб тушган.

“Биз чипталарга бўлаётган талабдан мамнунмиз. Шу кунгача деярли миллионга яқин аризалар келиб тушди. Эътиборлиси, чипталарга хорижий давлатлардан ҳам жиддий қизиқишлар бўлмоқда. Аниқроғи, аризаларнинг 21% бошқа давлат фуқароларидан келиб тушган. Бу борада Аргентина, Хитой, Мексика ва АҚШ етакчилик қилмоқда”, - дейди Эллер.

Маълумот учун, чипталар сотувининг биринчи босқичи 14 сентябрдан 12 октябргача бўлиб ўтади. Бунда мухлислар онлайн ариза юборишади, аммо уларнинг барчасига чипта берилиши кафолатланмайди. Агар, келиб тушган аризалар белгиланган чипталар сонидан ортиб кетса, чипта эгаси қуръа ташлаш йўли билан аниқланади. Ҳар бир ариза юборган ишқибоз бу борадаги якуний қарорни 16 ноябргача олади.

Эслатиб ўтамиз, чипталар сотувининг 2-босқичи жорий йилнинг 16-28 ноябрь кунлари бўлиб ўтади.