Жасур Ҳолматов: Мақсадим Супер лига клубида ўйнаш

"Вилоят Ҳоким кубоги-2018" турнирида бугун иштирокини бошлаган Фарғонанинг "Тошлоқ" жамоаси ўз таркибини кучайтиришга ҳаракат қилмоқда. Шу сабабдан Азиз Мамажонов ўз таркибига маҳоратли ижрочиларни жалб этмоқда. Улар орасида Россияда тўп суриб келган Жасур Холматов ҳам бор. Россияда маълум фурсат тўп сурган ва мухлис ва мутахассисларимиз учун нотаниш бўлган 23 ёшли футболчи билан қисқача суҳбатда бўлдик.

— Ўзингиз ҳақингизда тўхталиб ўтсангиз?

— Мен 1995 йилда Фарғонада туғилганман. Болагимдан футбол билан шуғулланиб келаман. 2014 йилда “Нефтчи” фарм клубида тўп сурдим. Кейинчалик Сергей Ковшов бошчилигидаги “Нефтчи” ўринбосларида маълум вақт шуғулландим. (Айни дамда Сергей Ковшов “Нефтчи” бош мураббийи-муаллиф).

 Фаолиятимнинг кейинги қисмини Қувасойнинг “Цементчи” жамоаси билан боғладим. Биз ўша йили Абдумалик Ҳакимов ва Илҳом Зайлобиддинов бошчилигида биринчи лигага йўлланма олдик. Кейин Москванинг “Метиор” клубига ўтдим.

— Россияга бориш тарихи кўпчилик учун қизиқ бўлса керак?

— Оила аъзоларим Москвада истиқомат қилишади. Акам Асилбек Эгамбердиев Москванинг “Локомотив” жамоаси академиясида таҳсил олган. Самаранинг “Крилья Советов” клуби ўринбосарларида тўп сурди. Ҳозир эса бир йилдан бери жароҳатини даволатмоқда. Акам менга қўнғироқ қилиб, “Метиор” жамоасида ўйнашимни айтди.

— У ердаги фаолиятингиз қандай кечди?

— “Метиор” жамоасини Иван Попов бошқарганди. Мен у ерга борганимда жамоа учинчи ўринни эгаллаб турганди. Мавсум якунида эса биринчи ўринни қўлга киритиб, биринчи лигада ўйнаш ҳуқуқига эга бўлдик. Лекин негадир жамоа биринчи лигада қатнашишни хоҳламади. “Метиор” сафида 25 та ўйинда майдонга тушиб, рақиблар дарвозасига 14 та гол урдим. 20 та голли пас бердим.

— “Тошлоқ” жамоасига қандай келиб қолдингиз. Кучли жамоаларда ўйнаш истаги борми?

— Фарғонага келганимдан кейин бир пайтлар “Нефтчи”да ўйнаган Сардор Соипов мени “Тошлоқ” жамоасига таклиф этди. Унинг ўзи ҳам ҳозирда шу жамоа шарафини ҳимоя қилмоқда. Ҳар бир футболчи кучли жамоаларда тўп суришни орзу қилади. Менинг орзуим ҳам шундай. Мақсадим Суперлига ва Про-лига клубларида ўйнаш.

Манба: Oltinvodiy.uz