Жозе Моуринью: Салоҳни мен сотмаганман

“Манчестер Юнайтед” клуби устози Жозе Моуринью “Челси”ни бошқарган пайтларида нима сабабдан айни дамда дунёнинг энг кучли футболчиларидан бирига айланган “Ливерпуль” ҳужумчиси Муҳаммад Салоҳни сотиб юборилганлиги ҳақида ўз фикрини билдириб ўтди.

“Барча Салоҳ мен туфайли “Челси”дан кетган деб ҳисоблайди. Бу мен ҳақимдаги яна бир бўхтон. Аслида эса барчаси бошқача бўлган. Мен аксинча “Челси”га Салоҳни сотиб олишни айтганман. У жамоага келганида ёш эди. Шу сабабли у “Челси”да ўйнаш учун ҳам психологик, ҳам жисмоний тайёр эмасди. Унга бошқа оламга тушиб қолиш қийинчилик туғдирди.

Биз уни “Фиорентина”га ижарага беришга қарор қилдик, қолаверса буни Салоҳнинг ўзи ҳам сўради. Кўпроқ ўйин амалиётига эга бўлиш учун бошқа жамоага кетишни истади. Кейинчалик “Челси” уни “Рома”га сотишга қарор қилди.

Айтишим керакки, Салоҳни ижарага бериш жамоавий келишилган қарор эди. Лекин мен унинг сотилишига рози бўлмаганман”, - дейди португалиялик мутахассис.