Клаттенбург ҳақида ҳақиқатлар

Марк Клаттенбург – эндиликда Саудия Арабистони ҳакамлар корпуси бошлиғи. Ха, у АПЛ ва Еврофутболни ташлаб, Осиёга йўл олди. Хўш, у нега бундай қарор қабул қилди? Пул учунми? Агарда, шундай бўлганида рефери Саудия эмас, Хитой чемпионатини маъқул кўрган бўлар эди, назаримизда. Аммо биз буларга тўҳталмоқчи эмасмиз. Шунчаки, Клаттенбург ҳақидаги айрим ҳақиқатларни эътиборингизга ҳавола этмоқчимиз, холос.

Клаттенбург 1975 йил Англияда таваллуд топган ва асл келиб чиқиши канадаликларга бориб тақалади. Асл касби электрик бўлган Клаттенбург ҳакамликни 18 ёшида бошлаган ва ўша вақтларда қанот ҳаками сифатида фаолият юритган. 1999 йилдан эътиборан эса қуйи дивизионларда бош ва қанот ҳаками сифатда фаолият юрита бошлаган Клаттенбург 2004 йилдан АПЛда ишлай бошлайди. Мазкур турнирдаги илк ўйини айни ўша йилнинг 21 августида “Эвертон” ва “Кристал Пелас” ўйинига тўғри келади.

2006 йил эса 30 ёшли Маркни ФИФА ҳакамлари қаторига қўшишади ва бу номга эришган энг ёш ҳакам сифатида қайд этилади.

Марк Клаттенбург 2006 йил Алан Ширернинг хайрлашув ўйинида ишлайди. Умуман олганда, Клаттенбург жаноблари “Ньюкасл” мухлиси саналади ва “қарғалар” иштирокидаги бирорта расмий ўйинда ҳакамлик қилмаган.

Клаттенбургни “МЮ” мухлислари ўзгача “хурмат” қилишади. Боиси, “Олд Траффорд”да ҳеч бир ҳакам мезбонлар дарвозаси томон бир ўйинда учта пенальти белгилаган эмас. Қолаверса, Клаттенбург” бутун фаолияти давомида кўрсатган “қизил” карточкаларининг катта қисми(6 та) айнан “қизил иблислар” футболчиларига кўрсатилгандир. Аммо жаноб Марк “МЮ” фойдасига ҳам қарор қабул қилган ҳолатлар ҳам йўқ эмас. Масалан, 2012 йил “Стемфорд Бридж”да Фернандо Торрес ва Бранислав Ивановичларни майдондан четлатган ва якунда “МЮ” 3:2 ҳисобида ғалаба қозонган.

Клаттенбургни “Эвертон” мухлислари ҳам “қадрлашади”. 2007йил Мерсисайд дербисининг сўнгги дақиқаларида “Ливерпуль” дарвозасига пенальти белгиламаган Клаттенбург шундан сўнг бир ҳафта ҳакамлик қилмаган. Қолаверса, 5 йил давомида “ирислар” иштирокидаги бирорта ўйинда ишламаган.

Ҳозирда “Барселона”да тўп сураётган Луис Суарес ўз автобиографиясида Клаттенбург ҳақида шундай ёзади: “Клаттенбург бошқарган бир ўйинимизни эслайман. Иккинчи бўлимда анча “жимиб” қолди. У менга “сариқ” карточка кўрсатди ва мен у билаб бу борада баҳслашдим”. Орадан 5 дақиқа ўтгач эса у менга бу “тоза” сариқ карточка эканлигини ва бошқа бу борада унга бундай фикр билдирмаслигим кераклигини қатъий тушунтирди. Кейин, мен голли узатмани амалга оширганимдан сўнг Клаттенбург “Мана бу бошқа гап” деб қўйди”.

Шундай очиқлик билан Клаттенбург 2009 йил Крейг Белламини майдондан четлатган эди. Марк танаффусда “Манчестер Сити” заҳирда ўриндиғида ўтирганлардан:

“Қандай қилиб, бу Беллами билан етти кун бирга ишлашга сабрингиз етади?” –, деб савол беради. Якунда эса Беллами ҳакамдан иккита “сариқ”ни олиб, кетидан “қизил”ини ҳам олиб, майдонни тарк этади.

2008 йил Клаттенбург 8 ойга четлатилади. Йўқ, бу майдон ташқарисидаги номақбуллик учундир. Хуллас, “Вест Бром” – “Кристал Пелас” ўйини якунланиши билан ўзининг “Porsche”сида Ньюкаслига Эд Ширеннинг концертига йўл олади. Инглиз ҳакамлари эса қонунга кўра ўйин бўладиган шаҳарга бирга келиши ва уни бирга тарк этишлари лозимдир. Айни шу сабаб уни узоқ муддатга дисквалификация қилишган эди.

Клаттенбург учун ўтган мавсум жуда омадли келди. Марк 3 та нуфузли финални бошқариб борди. Булар, Англия кубоги, ЕЧЛ ва Евро-2016 финаллари эди. Жумладан сўнгги иккисига атаб Клаттенбург тату чиздирган.

Ана шунақа…

Шаҳзод Холбоев тайёрлади