Кутилмаган чемпионлар

Футболда кутилмаган ҳолатлар жуда ҳам кўп учраб туради. Жумладан айрим ҳолларда ҳеч ким кутмаган жамоа мамлакат чемпионлигини қўлга киритган ҳолларни кўп кузатганмиз. Қуйида эса айнан шундай ҳолатларни эслашга ҳаракат қилиб кўрамиз.

“Боавишта” – 2000/01 Португалия чемпиони

Жейме Пачеко бошқарувидаги “Боавишта” ўтган аср охири ва янги аср бошларида чинакамига шпв-шув кўтаришган эди. “Пантерралар” жамоаси 2000/01 йилги мавсумда энг яқин таъқибчиси “Порту”дан бир очко кўп жамғариб мамлакат чемпионлигини қўлга киритади. Кейинги мавсум эса “Боавишта” “финиш”га учинчи бўлиб келади. 2004 йил эса клуб айрим сабабларга кўра профессионаллик мақомидан айрилади ва қуйи лигага равона бўлади.

“Вольфсбург” – 2008/09 Германия чемпиони

Ўша мавсум Феликс Магат жамоаси мавсум тугашига 9 та ўйин қолганида турнирда карвонбошиликни ўз зиммасига олади ва уни ҳеч кимга бермайди. Қизиғи “Бавария” бутун мавсум давомида иккинчи ўриндан юқорига кўтарила олмайди. Бунда албатта “темир Магат”нинг хиссаси катта эди. Ўша мавсум Графите – Жеко жуфтлиги биргаликда 54 та голга муаллифлик қилади. Бу “Вольфсбург”нинг мавсум давомида киритган голларининг 67 % и деганидир.

“Бурсаспор” – 2009/10 Туркия чемпиони

Эртугрул Соғлом бошқарувидаги “Бурсаспор” сўнгги турда “Бешиктош”ни мағлубиятга учратади. Параллел равишда кечган “Фенербахче” ва “Трабзонспор”клублари ўртасидаги ўйин дуринг билан ниҳоясига етгач, “Бурсаспор” ўз тархида илк бор мамлакат чемпионлигини қўлга киритади.

“Твенте” – 2009/10 Голландия чемпиони

Стив Макларен бошлиқ “Твенте” сўнгги турда “НАК” клубини меҳмонда мағлубиятга учратади ва энг яқин таъқибчи – “Аякс”ни 1 очкога ортда қолдирган холда илк ва ягона бўлиб турган чемпионликни қўлга киритади. Англиялик мутахассис бошқарувидаги мазкур жамоа мавсум бошидан сўнггига қадар 4-ўриндан қуйига тушмаганини эътироф этиш жоиз.

“Монпелье” – 2011/12 Франция чемпиони

Рене Жирар мураббийлигидаги “Монпелье” бутун мавсумни бир маромда ўтказиб якунда Анчелотти мураббилигидаги “ПСЖ”ни ҳам ортда қолдиришга эришади. Ўшанда “Монпелье” бош юлдузи – Оливье Жиру мавсум давомида 21 та гол киритиб мусобақа тўпурари бўлган бўлса, бундан ташқари шерикларини 9 та голли узтма билан таъминлагани тахсинга сазовор.

“Гент” – 2014/15Бельгия чемпиони

“Гент” анчагина камтарин бюджети ва таркиби билан мамлакат чемпиони бўлади. Албатта, бунда Бельгия чемпионатидаги ўзига хос бўлган регламенти ҳам катта рол ўйнагани ҳақиқат.

“Лестер” – 2015/16 Англия чемпиони

“Лестер эртаги” ҳақида барчангиз жуда ҳам яхши маълумотларга эга эканлигингиз аниқ. Шу боис “сийқаси чиққан” мавзуни яна ёритиш истагимиз йўқ.

Шаҳзод Холбоев тайёрлади