"Лацио" Лукас Бильянинг ўрнини ким билан тўлдирмоқчи?

Римнинг “Лацио” клуби тез орада жамоадан кетиши кутилаётган Лукас Бильянинг ўрнига муносиб номзодларни қидиришни бошлаб юборди. Football Italia нашри тарқатган хабарларга қараганда римликлар “Ливерпул”нинг собиқ аъзоси Лукас Лейва ҳамда “Бешиктош” хавбеки Толгай Арслонларни кўз остига олиб қўйган.

Айтиш керакки, “Лацио”нинг бу борадаги асосий нишони сифатида ўтган ойда мерсисайдликлар билан шартномаси якунланган ва эркин агентга айланган Лейва тилга олинмоқда. Маълумотларга кўра Рим клуби айни дамда 30 ёшли бразилиялик футболчи билан шахсий шартнома бўйича музокараларни олиб бормоқда. 26 ёшли Арслоннинг эса “Бешиктош” билан яна бир йиллик шартномаси бор.

Маълумот учун, Арслон ўтган мавсум Туркия чемпионатида жами 30та учрашув ўтказган. Лейва эса АПЛда 24та ўйинда иштирок этиб, 3та голга ассистентлик қилишга эришган.