Месси, Роналду ва Руни ҳеч кимнинг қўлидан келмайдиган рекорд ўрнатишди

Айни пайтда футболчилик фаолиятини давом эттираётган дунёдаги фақат уч футболчи - Лионель Месси ("Барселона" ва Аргентина терма жамоаси), Криштиану Роналду ("Реал" ва Португалия терма жамоаси) ҳамда Уэйн Руни ("Манчестер Юнайтед" ва Англия терма жамоаси) ўз клублари ва мамлакатлари терма жамоаларининг энг яхши тўпурари бўлиб турибди.

Бугунги кунда "Барселона" муваффақиятларида катта роль ўйнаётган Лионель Месси каталонияликлар таркибида 481 та, Аргентина терма жамоаси сафида 57 та гол билан рекордчига айланган.

Европа чемпиони ва "Олтин тўп" соҳиби Криштиану Роналду эса "Реал" учун 382 та, Португалия терма жамоаси ҳужумчиси сифатида 68 та гол муаллифи бўлган.

Яқиндаги "Манчестер Юнайтед" таркибида энг кўп гол урган футболчига айланган Уэйн Руни юқоридаги икки тўпурар қаторига қўшилди. "Манчестер Юнайтед" рақиблари дарвозасини 250 марта аниқ нишонга олган Руни Англия терма жамоасида ҳам энг кўп - 53 та гол урган.

Энги муҳими шундаки, учала футболчи бу кўрсаткичларни янада яхшилаб, тўпурарлик рекордларини мустаҳкамлаш имкониятига эга.

SPORTS.uz