“Металлург” футболчилари “Футбол қоидаларидаги ўзгаришлар” билан таништирилди

Халқаро футбол федерациялари уюшмаси (ФИФА) футбол қоидаларига бир қатор жузъий ўзгаришлар киритди. Айнан ФИФАнинг кўрсатмалари асосида мамлакатимизда фаолият юритаётган таниқли ҳакамлар ҳамда инструкторлар миллионлар ўйини соҳасида фаолият юритаётган клублар, жамоалар, ОАВ вакиллари учун семенарлар ташкил этишаяпти.

Худди шундай тадбирларда бири “Металлург” футбол клубининг янги мавсумга тайёргарлик олиб бораётган қароргоҳи – Чирчиқ шаҳрида бўлиб ўтди. Семенарни ФИФА рефериси Владислав Цейтлин олиб борди. У “Футбол қоидаларидаги ўзгаришлар” мавзусида маъруза қилди, футболчиларни, жамоа мураббийларини қизиқтирган саволларига жавоб қайтарди.

Бугун пойтахтимиздаги “Бунёдкор” академияси  футбол майдонида “Металлург” ёшлар таркиби мезбонларнинг ёшлар таркибига қарши назорат учрашувини ўтказади. Икки кундан кейин эса бекободликларнинг асосий таркиби “Бунёдкор” ёшларига қарши тўп суради. 5 февраль санасида эса “Металлург” ўқув-машғулот йиғинини давом эттириш учун Туркиянинг Анталия шаҳрига учиб кетади.