Мэйвезер кўтараётган чемпионлар ёхуд Флойд ўзбек йигитига ишонмоқда
Енгилмас жаҳон чемпиони Флойд Мэйвезернинг "Mayweather Promotions" промоутерлик компаниясининг расмий сайтида бокс оламининг машҳур юлдузи бирга ишлаётган ва келажакда уларнинг улкан ютуқларга эришишига ишонаётган 26 нафар чарм қўлқоп устасининг номи эълон қилинди.
Флойд Мэйвезер кўпчилик мутахассислардан фарқли ўлароқ, профессионал боксда катта ютуқларга эришмаган, истеъдодли лекин оддий боксчилар билан ишлашни маъқул кўради. Ҳаваскорлар боксида жаҳон чемпиони ва Олимпия ўйинлари ғолиби бўлган юлдуз боксчиларга эътибор қаратмайди.
Биз учун аҳамиятлиси шундаки, Флойд Мэйвезернинг назари тушган боксчилар орасида ўзбек йигити - Санжарбек Раҳмонов ҳам бор.
Биз сизларни Мэйвезер билан ишлаётган боксчилар орасида энг кучли ва ўзига хос услубга эга бўлган чарм қўлқоп усталари билан таништирамиз.
1. Жервонта Дэвис. 22 ёш. Рекорд: 17-0 (16 КО)
Кўчада муштлашганидан кейин бокс залига олиб кетилган бу боксчи ҳаваскорлар ўртасида катта тажриба тўплади. Ёш бўлишига қарамай, ҳаваскорлар ўртасида 206 та ғалабага (15 та мағлубият) эришган. Профессионал боксга ўтгач, Мэйвезернинг жамоасидагилар орасида биринчи бўлиб жаҳон чемпионлигини қўлга киритди. У бир неча кун олдин IBF йўналиши бўйича жаҳон чемпиони - пуэрто-риколик Хосе Педрасага қарши рингга чиқди ва рақибини нокаут қилди.
2. Санжарбек Раҳмонов. 27 ёш. Рекорд: 6-0-1 (3 КО)
Санжарбек Раҳмонов Флойд Мэйвезер ишонч билдирган МДҲ давлатларининг ягона вакили. Ўзбекистонлик боксчи ҳаваскорлар ўртасида бой тажриба тўплаган. Осиё чемпиони ва Осиё ўйинлари совриндори. 2015 йили Флойд Мэйвезер компанияси билан шартнома тузган. Санжарбек илк жангини машҳур боксчилар Эдриен Бронер ва Шон Портер баҳси олдидан ўтказган. Кейинги беллашуви Флойд Мэйвезернинг сўнгги жанги олдидан бўлган.
Санжарбек учун профессионал боксдаги дастлабки қадамлари оғир келган, ҳамюртимиз профессионал боксдаги биринчи спарринг жангидан сўнг фаолиятини тугатишни ўйлаб қолганди. Лекин мана ҳаммаси ортда қолди ва у мағлубиятсиз одимларини давом эттирмоқда. Санжарбек Раҳмонов профессионал боксдаги саккизинчи жангини 24 февраль куни ўтказади.
3. Шариф Богере. 28 ёш. Рекорд: 29-1 (20 КО)
Шариф боксга ўз дўстини кузатгани келиб, залда қолиб кетди. У кўчада қуролланган жиноятчилар билан ҳам муштлашди, машғулотлардан кейин ичиш учун сув қидиришига тўғри келди. Ҳамма қийинчиликларни енгган Шариф ҳаваскорлар ўртасида 68 та жангда ғалаба қозониб, (4 мағлубият) беш карра Африка чемпиони бўлди. Кейин эса профессионал боксга қадам қўйди. 2013 йили бу боксчи WBA йўналиши бўйича жаҳон чемпионлиги учун жангда аламли мағлубиятга учради.
4.Эндрю Табити. 27 ёш. Рекорд: 13-0 (11 КО)
Мэйвезер компаниясидаги ягона оғир вазнли боксчи. Америкалик бу йигит боксчилар ўртасида одоби билан машҳур. Эндрю нафақат рингда, балки кўчада ҳам умуман сўкинмайди. Бироқ рингдаги важоҳати туфайли "Ҳайвон" деган лақабни орттириб олган.
5. Латондрия Жонс. 30 ёш. Рекорд: 5-0 (2 КО)
Мэйвезер билан ишлаётган ягона аёл боксчи. Ўта кучли зарба соҳибаси. Америка қонунчилиги бу қизни 24 йилга қамоққа ҳукм қилмоқчи бўлган. Лекин Латондрия бу жазодан қандай қутилиб қолганини ҳеч кимга айтмайди.
6. Хосе Варгас. 18 ёш. Рекорд: 6-1 (4 КО)
Бу йигитча профессионал боксчи бўлиш учун мактабдаги ўқишини ташлаб кетган. Ҳаваскорлар боксида ўсмирлар Олимпиадаси ғолиби бўлган. Профессионал боксчи мақомини олгунга қадар 72 та жангда ғалаба қозонган. Мақтанчоқ боксчи мактабдан кўра рингда имконияти кўплигини таъкидлаб келади.
Фикрлар