“Насаф”нинг ОЧЛ-2018 плей-оффдаги рақиби “Ал Файсалий” ҳақида билишимиз керак бўлган маълумотлар!

Иорданиянинг Амман шаҳрига қарашли "Ал Файсалий" клуби 1932 йили ташкил топган. Уй учрашувларини “Шахзода Мухаммад” стадионида ўтказади, ўйингоҳ сиғими – 17 000 томошабинга мўлжалланган.

Умуман олганда, “Ал Файсалий” клуби “аждарлар”га нотаниш эмас. Мазкур жамоалар бунгача ОФК кубогининг нимчорак финалида туқнаш келишган. 2011 йили 24 майда, “Марказий” стадионда бўлиб ўтган учрашувда қаршиликлар рақибини 2:1 ҳисобида мағлуб этган ва чорак финал йўлланмасини қўлга киритган.

“Ал Файсалий” мамлакат чемпионатида етакчи клуб ҳисобланади. Амманликлар ўз тарихида 32 карра чемпионликни, 18 карра федерация кубогини, 15 марта суперкубокни ва икки марта ОФК кубогини қўлга киритганлар.

Иордания ПРО лигасида 12 жамоа иштирок этади. Айни пайтда “Ал Файсалий” мамлакатнинг вице- чемпиони ҳисобланади.

Иордания ПРО лигасида икки клуб етакчилик қилади. Мамлакат чемпионлиги ёки бошқа мусобақаларда рақобат асосан “Ал Файсалий” ва “Ал Вехдат” ўртасида кечади. Айни пайтда премьер-лигада давралар оралиғидаги танаффус давом этмоқда. Иккинчи давра учрашувларига 24 январь кунидан старт берилади.

“Ал Файсалий” 11та ўйиндан сўнг 19 очко жамғариб, турнир жадвалининг 4-поғонасида бормоқда. 24 январь куни улар иккинчи давранинг илк беллашувини  “Ал Ярмук” жамоасига қарши ўтказади.

“Ал Файсалий” яқинда жамоа бош мураббийлигига Набил Кукини таклиф этилди ва ўзаро келишувга эришди. Ушбу мутахассис Драган Талажич ўрнини эгаллади. Тунислик 47 ёшли мураббий Набил Куки, бунгача Иордания премьер лигаси пешқадамларидан бири “Ал Рамтҳа” жамоасини бошқараётган эди. Кукига маҳаллий мураббийлардан Надир Хбири ёрдам бермоқда.

“Ал Файсалий” клубининг беш нафар футболчиси яқинда ФИФА қарорига кўра, бир йилга футболдан четлатилди. Жазоланганлар ўрнига клуб, янги ўйинчиларни қўшиб олмоқда. Яқинда таркибга албаниялик ярим ҳимоячи Албан Меҳа жалб этилди. Жамоа сафида маҳаллий футболчилар қатори яна сенегаллик, ливиялик ва польшалик легионерлар бор.

Жамоанинг 27 ёшли ливиялик ҳужумчиси Акрам Зувай ўтган йили 12та тўп киритиб, чемпионат тўпурари бўлган.

Эслатиб ўтамиз, “Насаф” – “Ал Файсалий” учрашуви 30 январь сешанба куни, Қарши шаҳридаги “Марказий” стадионда ўтказилади. Учрашув 16:00да бошланади.