Нокаутчиларимиз катта жангга йўл олди
Профессионал боксда мағлубиятсиз иштирок этаётган ҳамюртларимиз - Қудратилло Абдуқаҳҳоров (9-0-0, 6КО) ва Азизбек Абдуғофуров (4-0-0,4КО) шу йилнинг 10 февраль куни Сингапурда навбатдаги жангларини ўтказади.
Нокаутчи боксчиларимиз юртимизда ўтказилган ўқув-машғулот йиғинларини якунлаб, бугун тонгда Малайзияга жўнаб кетди. Қудратилло ва Азизбек жангга қадар бу ерда машғулот ва спарринг жангларини ўтказади.
- Бўлажак рақибларини ўта жиддий боксчилар бўлгани учун пухта тайёргарлик кўришимиз керак, - деди Қудратилло Абдуқаҳҳоров SPORTS.uz ахборот портали мухбирига. - Малайзияда кўпроқ спарринг жангларига эътибор қаратамиз. Техник, тактик ва жимсоний машғулотларда тўплаган кўникмаларимизни рингда синовдан ўтказамиз. Насиб қилса, юртимизга ғалаба билан қайтамиз.
10 февраль куни Сингапурда бўладиган профессионал бокс кечасида Қудратилло Абдуқаҳҳоров украиналик Виктор Плотников (34-4-0, 16 КО) билан жанг қилади. Бу баҳс 10 раунд қилиб белгиланди.
Профессионал бокснинг WBC йўналиши бўйича Asian Boxing Council middleweight title - Осиё чемпионлик камарини қўлга киритган Азизбек Абдуғофуров бу совринини таиландлик Сиримонгкол Эамтуамдан ҳимоя қилади.
Таиландлик боксчи профессионал рингда 93 та жанг ўтказиб, 91 марта зафар қучган, шулардан 57 тасида рақибларини муддатидан олдин енгган.
Сиримонгкол Эамтуам бир неча марта турли вазнларда жаҳон чемпионлигига сазовор бўлган ўта кучли профессионал боксчи ҳисобланади. Тажрибали чарм қўлқоп устаси қарийб 15 йилдан буён мағлубият нималигини билмай келмоқда.
Рақиб қанчалар кучли бўлмасин, биз ўз бокчиларимизга ишонамиз ва уларга бўлғуси жангларда улкан ғалабалар тилаймиз!
Фикрлар