Одил Аҳмедов бор жойда Уэйн Руни керак эмас

 

"Манчестер Юнайтед"да ҳар доим ҳам асосий таркибдан жой ола билмаётган Уэйн Рунининг Хитой клубларидан ўта катта маблағ ваъда қилинган таклифлар олаётгани ҳақида жуда кўп хабарлар тарқатилди. Бундан ташқари, Европа клублари ҳам Уэйн Рунига қизиқаётгани айтилган эди.

Шанхай футбол уюшмаси ушбу ҳудуд шарафини ҳитмоя қилаётган "Шанхай СИПГ" ва "Шанхай Шеньхуа" жамоалари ўзлари учун керакли футболчиларни трансфер қилиб бўлишгани ва уларга "Манчестер Юнайтед" сардори керакмаслигини таъкидлаб, Рунига Шанхай клубларидан қизиқиш бўлганини инкор этишди.

- Хитой Суперлигасида Шанхай шарафини ҳимоя қиладиган жамоалар трансфер ишларини ёпган ва уларда бошқа легионерлар учун жой қолмаган, - дейилади Шанхай футбол уюшмаси баёнотида. - Уюшмамиз раҳбари юқоридаги хабарларни миш-мишдан бошқа нарса эмаслигини айтди.

Хусусан, "Шанхай СИПГ" жамоаси январь ойидаги траснферлар мавсумида легионерлардан Ўзбекистон терма жамоаси сардори Одил Аҳмедов, "Челси"да тўп сурган Бразилия терма жамоаси ярим ҳимоячиси Оскарни ўз таркибига қўшиб олди. Ўтган йили бу клуб бразилиялик машҳур футболчи Халк ва унинг ҳамюрти Элкесонни ҳам трансфер қилганди. Бу футболчилардан ташқари Шанхайнинг бу жамоаси рўйхатида хорижлик чарм тўп усталаридан ганалик машҳур тўпурар Асамоа Гьян, португалиялик ҳимоячи Рикарду Карвалью, аргентиналик Дарио Конка ва Жанубий Корея вакили Ким Ю Ён ҳам бор.

"Шанхай Шеньхуа" жамоаси бу йилги трансферлар вақтида машҳур футболчилардан аргентиналик Карлос Тевес, парагвайлик Оскар Ромерони олди. Шунингдек бу жамоа рўйхатида сенегаллик Демба Ба, нигериялик Обафеми Мартинс, колумбиялик Фредди Гуарин, Дованни Морено, кореялик Ки Хи Ким каби таниқли футболчилар бор.

Айни пайтда Шанхайнинг икки клуби янги мавсумга қизғин тайёрланмоқда.

SPORTS.uz

Фикрлар

Фикр қолдириш учун авторизациядан ўтинг!