Олег Тюлкин  ва Шавкат Саидовнинг “Металлург” – “Динамо” учрашуви ҳақидаги фикрлари

 

Хабарингиз бор, олий лига биринчи турида “Металлург” – “Динамо” баҳси бўлиб ўтди. Унда самарқандликлар 2:0 ҳисобида зафар қучишди.

"Металлург" - "Динамо" учрашивидан иккала жамоа мураббийлари иштирокида матбуот анжумани ўтказилди.

Олег Тюлкин, “Динамо” жамоаси бош мураббийи: - Бекободда ўйин оғир кечини билгандик, сабаби биз олий лигага энди қайтдик, биринчи ўйин, мезбон жамоа эса жуда тажрибали. Шу сабабдан ҳам учрашувга ҳимоявий тактикани танладик. Хато қилмаган эканмиз, ғалаба қозондик. Барча мухлисларимизни биринчи ғалаба билан табриклайман. Бу ютуқ йўлида меҳнат қилган барча футболчиларга, мураббийлар штабига ва бизнинг муваффақиятимизга ишонган мухлисларга эса катта раҳмат.

Бугун майдоннинг ҳолатини кўрдингиз, бундай шароитда ҳимояланиш осон. "Металлург" эса техникаси юқори жамоа. Майдонларимиз яхши ҳолатга келганда бекободликлар нималарга қодирлигини кўрсатишларига ишонаман. Майдонга туширилган ўйинчилар хусусида тўхталадиган бўлсам, бизга тезкор ўйинчилар керак эди. Мезбонлар бутун жамоа бўлиб ҳужумга ўтгач қочиб кетадиган ёшларни майдонга ташладик. Натижада иккинчи голни киритиб, ғалабани мустаҳкамладик, - дейди “Динамо” устози.  

Шавкат Саидов, “Металлург” ФК жамоа бошлиғи: - Биринчи учрашувни ўз мухлисларимиз қаршисида бой бериш оғир, аммо бу футбол. Унда кутилмаган натижалар учраб туради. Назаримда биз ўйинни бошлангунча бой бериб қўйгандекмиз. Олий лигага энди қайтган жамоани осонликча таслим этамиз деган хом ҳаёл футболчиларимизга панд берди. Нима ҳам дердим, энди кейинги учрашувларга тайёргарлик кўрамиз. Тайёргарликни эса бугундан бошлаймиз.Самарқандликлар ҳаққоний ютуққа эришишди, уларни уч очко билан табриклайман. Мавсум эндигина бошланди. Дастлабки учрашувлардан кейин хулоса чиқариб бўлмайди. Кейинги турларда ўз ўйинимизни топиб олишимизга ва мухлисларимизни тез орада хурсанд этишимизга ишонаман, - дейди Шавкат Саидов.

Фикрлар

Фикр қолдириш учун авторизациядан ўтинг!