Ой сарҳисоби. Январь ойининг омадсизлари

2017 йилнинг дастлабки ойи ҳам мана якунланиш арфасида турибди. Янги йилнинг илк ойи футбол оламида кимлар учундир омадли ўтган бўлса, бошқалар учун аксинча ўта омадсиз келди. Биз эса айнан ана шу омадсизларни санаб ўтамиз.

“Ницца”

Сабаб: Чемпионатда карвонбошиликни бой берди

Қишки танаффусга “Ницца” футболчилари Франция чемпионати етакчиси сифатида чиқишган эди. Бироқ январь ойида Люсень Фавр бошчилигидаги жамоа иккинчи ўринга тушиб қолди. Чемпионатдаги икки аутсайдер – “Мец” ва “Бастия”ларга қарши ўйинларда бор-йўғи 2 очкони қўлга киритилгани масалани янада чигаллаштирди. Боз устига Фавр жамоасига Унаи Эмери бошлиқ “ПСЖ” ҳам етиб олишга яқин турибди. Агарда вазият шу тақлид давом этадиган бўлса клуб ЕЧЛ йўлланмаларидан ҳам қуруқ қолиши мумкин. Зеро, “Лион” ҳам яхшигина “тезлик олди”.

Зинедин Зидан

Сабаб: Испания кубогидаги омадсизлик

Зидан жамоаси январь ойининг ўзидаёқ, ўтган йилги мағлубиятлар сони билан тенглашиб олди. Ла лигада меҳмонда “Севилья”га мағлуб бўлган “Реал”ни барча тўғри қабул қилди. Боиси, ҳар қандай жамоа эртами, кечми мағлубиятга учрайди. Аммо кубок доирасида “Сантьяго Бернабеу”да “Сельта”га имконият бой берилишини ҳеч ким кутмаган эди. Нима бўлган тақдирда ҳам “Реал” битта совриндан қуруқ қолиши аниқ бўлди.

Тўғри, салбий натижаларга жамоанинг асосий футболчиларидаги жароҳат ҳам сабаб бўлди. Лекин спортда, хусусан футболда натижага мураббий жавобгар бўлади.

Димитри Пайет

Сабаб: Можаролар

“Кристал Пелас”га қарши ўйиндан олдин ташкиллаштирилган матбуот анжуманида “Вест Хэм” бош мураббийи – Славен Билич журналистларга қуйидаги гапларни айтиб ўтди: “Бизда жамоамизнинг энг яхши футболчиси Димитри Пайетни сотиш ниятимиз йўқ. Гарчи унда “Вест Хэм”да бошқа ўйнаш истаги бўлмасада, уни жамоада олиб қоламиз. Мен раҳбарият билан гаплашдим, бизга пул керак эмас. Унинг “Вест Хэм” билан шартномаси эса хали тугаганича йўқ. Биз – унинг кетишига қаршимиз”.

Француз “Вест Хэм”да ўйнашдан бош тортмоқда ва уни “Марсель”га қўйиб юборишларини сўрамоқда. Ўз навбатида француз клуби Пайет учун “болғачилар”га дастлаб 19 млн, сўнгра 20 млн фунт сўради. Лекин бу таклиф Лондон жамоасини қизиқтиргани йўқ. Ушбу можаро аввалида “Вест Хэм” Пайетни сотмаслигини маълум қилган бўлса, январьнинг сўнгги кунларида ўз позициясини ўзгартирб, “Марсель”дан 30 млн фунт сўради. Ушбу трансфер амалга ошиши айни вақтда ҳақиқатдан анча йироқ. Шундай экан Евро-2016 нинг юлдузларидан бири бўлган Пайет мавсумнинг қолган қисмини майдон ташқарисида ўтказиши кутилмоқда. Пайетнинг йўқлиги эса жамоа натижаларига ҳозирча салбий таъсир этаётганича йўқ.

Криштиану Роналду

Сабаб: Самарадорликнинг тушиб кетиши

Мадриднинг “Реал” клуби етакчиси ва 2016 йилнинг энг яхши футболчиси – Криштиану Роналду ҳозирча январь ойида 3 та тўп киритишнинг уддасидан чиқди. Жумладан, “Гранада”га қарши ўйинда йирик ҳисобда якунига етган ўйинда амалда ҳеч нарсани англатмаган гол киритди. Ундан сўнг “Севилья” билан ўйинда 11 метрли жарима зарбасини аниқ амалга оширди. Лекин ушбу гол “қироллик клуби”нинг мағлубиятдан қутулиб қолиши учун камлик қилди. Ваниҳоят, “Сельта”га жарима зарбасидан киритилган гол. Бу гол ҳам “Реал”ни кубокда олиб қолгани йўқ. Шундай бўлсада, Зидан унинг имкониятига шубҳа билан қараётгани йўқ. “Мен Бензема ёки Роналдунинг сўнгги ўйинларда нечта гол киритганини билмайман ва бу мени ҳавотирга солаётгани йўқ. Мени Модрич ва Марселоларнинг жароҳатлари безовта қилмоқда. Биз ўзимизни босиб олишимиз керак. Мухлислар биздан бунданда кўпроғини кутишади. Бизга уларнинг далдаси керак”, - деб айтиб ўтган эди “Реал” мураббийи Зинедин Зидан. Роналдунинг ўзи эса қулай вазиятларда ё дарвоза устуни ва тўсинини пойламоқда, ёки тўпни дарвозабонларга “совға” қилмоқда.

Юрген Клопп

Сабаб: 7 ўйинда 1 ғалаба

2016 йилнинг сўнгги кунида “Ливерпуль” “Манчестер Сити”ни мағлубиятга учратган эди. Қизиғи ўшандан буён “қизиллар” фақат бир бора ғалаба қозонишни уддалади холос. Январь ойи Клопп жамоаси учун ўта омадсиз ўтди. “Сандерленд”, “Суонси” ва “Манчестер Юнайтед”ларга қарши ўйиналрда “Ливерпуль” бор-йўғи икки очко ишлади.

Тўғри, “МЮ” билан меҳмонда дуранг ўйнаш ёмон натижа эмас. Бироқ ўз майдонида “Суонси”га имконият бой берилишини ҳеч ким кутмаган эди. Клопп жамоаси январь ойида фақат Англия кубогида “Плимут”ни мағлуб эта олди. Лига кубогида эса “Саутгемптон” ҳар иккала ўйинда ҳам “Ливерпуль”дан устун келди.

Шаҳзод Холбоев тайёрлади