Ўзбекистон терма жамоаси Туркия йиғинини бошлади

 

Ўзбекистон миллий терма жамоаси ЖЧ–2018 саралаш босқичи иккинчи даврасига тайёргарлик кўриш мақсадида Туркиянинг Анталия шаҳрида 8–12 февраль кунлари навбатдаги ўқув-машғулотлар йиғинини ўтказиши борасида хабар бериб ўтгандик.

Маълум бўлишича, Ўзбекистон терма жамоаси бугундан Туркиянинг Анталия шаҳрида қисқа муддатли йиғинга киришди.

Мазкур йиғин доирасида Ўзбекистон терма жамоаси иккита ўртоқлик учрашуви ўтказади. 10 февраль куни Самвел Бабаян шогирдлари Россия Премьер-лигаси вакили “Амкар” клуби билан, 11 февраль куни эса Арманистоннинг “Алашкерт” жамоаси билан куч синашади.

Бир неча кун олдин терма жамоа бош мураббийи Самвел Бабаян йиғинга жалб этилган футболчилар рўйхатини эълон қилганди.

Бўлажак йиғин ФИФА кунларига тўғри келмаганлиги учун легионер футболчилар Туркиядаги ўқув-машғулотларига таклиф этилмади.

Эслатиб ўтамиз, ЖЧ–2018 саралаш босқичи “А” гуруҳи 5-туридан кейин Ўзбекистон терма жамоаси 9 очко билан учинчи ўринда бормоқда. Эрон 11 очко билан биринчи, Жанубий Корея эса 10 очко билан иккинчи поғонада бормоқда.

Фикрлар

Фикр қолдириш учун авторизациядан ўтинг!