Пётр Лебедь: Истоминнинг Жокович устидан қозонган ғалабаси жаҳон тенниси тарихига кирди
"Дэвис" кубогида Ўзбекистон терма жамоасига сардорлик қилаётган Пётр Лебедь миллий терма жамоамиз етакчиси Денис Истоминнинг Австралия очиқ чемпионатидаги иштироки ҳақида ўз фикрларини билдирди ва болгариялик Григор Димитров билан бўлган учрашувда ҳамюртимизнинг жароҳатини ҳам изоҳлади.
"Дениснинг Мельбурндаги ўйинлари энг юқори баҳога муносиб. Жаҳоннинг иккинчи ракеткаси Новак Жокович устидан қозонилган ғалаба ҳам ҳақиқатан катта натижа бўлди. Шубҳасиз, бу учрашув нафақат ўзбек тенниси, балки жаҳон тенниси тарихидан ҳам жой олди.
Ўйлашимча, бу ғалаба Денисда ўз кучига ишончни оширди. Энди у энг кучли теннисчилар билан тенгма-тенг курашишга ва уларни мағлуб этишга қодирлигини билади. Пабло Карреньо-Буста билан бўлган ўйинда Денис Истомин ўзининг энг кучли хислатларини кўрсата олди. Григор Димитровга қарши баҳсда ҳам Денис ижобий натижага эришса бўларди. Бироқ, жароҳат ҳалақит қилди.
Жароҳат қанчалик жиддий? Ҳозирча аниқ бир фикр айтолмайман. Аниғи шуки, Дениснинг сон мушаклари лат еган. Тез кунларда тиббиёт ходимлари аниқ ташхисни айтади", - деди Пётр Лебедь Sports.uz ахборот портали мухбири Мухтар Марданов билан суҳбатда.
Фикрлар