“Қўқон-1912”: Анънага айланиб бораётган мусобақа

Сўнгги йилларда “Қўқон-1912” ташббуси билан “Сиз “Қўқон-1912” жамоасида ўйнашни хоҳлайсизми?” деб номланган турнир ўтказилиб келинмоқда. Бу йил ҳам ушбу анъана давом эттирилди, деб хабар бермоқда қўқонликлар матбуот хизмати.

Кеча “Марказий” ўйингоҳда тўртта жамоа иштирокида ана шундай мусобақа ташкил этилди. Мусобақада асосан 1997-2000 йилларда туғилган маҳаллий ёш футболчилар иштирок этишди.

Ушбу кичик турнирни жамоа раҳбарлари, бош мураббий Нўъмон Ҳасанов ва ўринбосарлар мураббийлари катта қизиқиш билан кузатиб боришди. Бу бежиз эмас албатта. Айнан мазкур мусобақада ўзининг иқтидорини намойиш эта олган ёшлар, ўринбосарларимизнинг бўлажак йиғинларига таклиф этилади.

Сўнгги йилларда “Қўқон-1912” жамоаси болалар футболига жиддий эътибор қаратмоқда. Айни дамда клубимиз қошида бир нечта футбол мактаблари фаолият олиб бормоқда. Бунинг самараси улароқ, жамоамиз ҳар йили янги футболчиларни кашф этиши одатга айланган.