Қудратилло Кличконинг вакили билан жанг қилади

Профессионал боксчилар рейтингида Ўзбекистон боксчилари орасида биринчи ўринни эгаллаб турган Қудратилло Абдуқаҳҳоров (9-0-0, 6КО) 10 февраль куни Сингапурда навбатдаги жангини ўтказади.

Оғирлиги 66,6 килограмм бўлган боксчилар ўртасидаги жангларда қатнашаётган ҳамюртимиз профрингдаги 10 жангини кучли рақиб - украиналик Виктор Плотиковга (34-4-0, 16КО) қарши ўтказади.

Виктор Плотников профессионал бокс оламига машҳур ака-ука чемпионлар - Виталий ва Владимир Кличколарга тегишли бўлган "K2 Promotions" промоутерлик компанияси шарафини ҳимоя қилаётган боксчидир.

Виктор профессионал боксдаги фаолиятини 2002 йили бошлаган. Европа ва қитъалараро чемпионлик камарини қўлга киритган. Global Boxing Union йўналиши бўйича жаҳон чемпиони ҳисобланади.

Фаолияти давомида Шерзодбек Олимжонов ва Файзулла Аҳмедов каби ўзбекистонлик боксчиларни мағлубиятга учратган. Шунингдек, Владимир Янизашвили, Валерий Бражник, Тарас Бойко каби боксчилар илк мағлубиятини айнан Виктор Плотниковдан қабул қилиб олган.

Қудратилло Абдуқаҳҳоров SPORTS.uz ахборот порталига бу галги рақиби аввалгиларидан кучоли эканини ва шунга яраша пухта тайёргарлик кўраётганини таъкидлади.

- Виктор Плотников профессионал рингда пишган боксчи, - дейди Қудратилло Абдуқаҳҳоров. - Албатта, данг олдидан ҳаёжон бор. Лекин бўлажак баҳс учун менинг ҳам ўз режаларим тайёр. Ҳозир энг муҳим масала жангга пухта тайёргарлик кўриш.

Қудратило бўлажак жангга тайёргарликнинг биринчи босқичини Андижон ва Тошкентда олиб борди. Айни пайтда ҳамюртимиз Малайзияда ташкиллаштирилган ўқув-машғулот йиғинида қатнашмоқда.

- Бу ерда кунига икки маҳал машғулот ўтказилмоқда, - дейди Қудратилло Абдуқаҳҳоров. - Жисомний машғулотлар асосан, бадантарбия, кросс, тренажёрда ишлаш, спарринг, лапа уришдан иборат бўлмоқда. Асосий эътибор, жисмоний тайёргарликни оширишга қаратилган. Чунки жанг 10 раунд қилиб белгиланган.

Қудратилло Абдуқаҳҳоров Виктор Плотников билан бўладиган жангдан кейин 25 март куни зимбабвелик Африка чемпиони Чарльз Манючига қарши рингга чиқади. Ҳамюртимиз 12 раундлик жангда африкалик боксчи эгаллаб турган WBC Silver – кумуш камарига даъвогарлик қилади.

Қудратилло муҳим учрашувларга қандай тайёргарлик кўраётганини қуйидаги видеолавҳадан кўриб олишингиз мумкин.

SPORTS.uz