Расман! Эдгар Гесс "Шўртан" бош мураббийи этиб тайинланди
Иккинчи давра ўйинларига тайёргарлик кўраётган “Шўртан” жамоаси ҳал қилувчи йиғинларни Тошкентда ўтказмоқда. 5 июлдан эътиборан Ғузорда бошланган ушбу жараёнларда футболчилар Виталий Легай ва Геннадий Кочневлар қўл остида машғулотларда қатнашишаётган эди.
Давралар оралиғида "Шўртан" раҳбарияти бир қатор тажрибали мутахассислар билан мулоқот олиб борди ва ниҳоят куни кеча якуний қарор қабул қилинди.
Бундан аввал ҳам “Шўртан”да фаолият кўрсатган, ғузорлик мухлислар меҳрини қозонган ва айтиш жоизки, ҳозирча жамоани ўз тарихида энг юксак натижаларга эриштирган Эдгар Гесс “Оқ бўрилар” бошқарувига муносиб номзод деб топилди.
25 июль кечки машғулотлар арафасида "Шўртан" раҳбарияти футболчилар ва мураббийлар штаби вакиллари билан йиғилиш ўтказди ҳамда Э.Гессни расман бош мураббий сифатида таништирди.
Эслатиб ўтамиз, ушбу мураббий “Шўртан”ни 2009-2011 ва 2012-2013 йиллар давомида бошқариб борди. Унинг қўл остида “Оқ бўрилар” 2010 йилги мавсумда Олий лигада 4-ўринни эгаллашди. Шу йилнинг ўзида “Шўртан” Ўзбекистон Кубогининг финалига қадар етиб борди. 2011 йилги мавсумда эса Ғузор жамоаси Халқаро мусобақа - Осиё Конфедерацияси Кубогида муваффақиятли иштирок этди. Гуруҳдан кейинги босқич - 1/8 финалга чиқиш вазифасини уддалади.
Фикрлар