“Рома” янги мавсумда қандай кўринишга эга бўлади?

Ўтган Чемпионлар Лигаси кашфиётчиси бўлган “Рома” қайноқ трансфер бозорини бошидан кечирмоқда. Римликларни бир қатор асосий таркиб футболчилари тарк этган бўлса, уларнинг ўрнига номдор вакиллар келиб қўшилди. Янги мавсумда “Рома”ни қай кўринишда кўришимиз мумкин?

Римликлар ўтган мавсумни учинчи ўринда якунлади. Улар “Наполи” ва “Ювентус”дан кейин маррага етиб келишди. Бироқ уларнинг А Серия номдор клубларидан кейинги ўринни эгаллаши улар орасидаги сифат яқин деган маъно касб этмайди. А Серия ҳақида гап кетганда, барча Роналдунинг шов-шувли тарзда “Ювентус”га ўтганини гапираётган бир пайтда, “Рома” ҳам бир қатор трансферларни амалга оширди.

Улар икки йирик йўқотишни бошидан кечирганини эслатиб ўтиш зарур. Жамоани дарвозабон – Алиссон “Ливерпуль”га алмаштирган бўлса, Раджа Наингголан А Сериянинг бошқа бир вакили “Интер”га ўтиб кетди.

Уларнинг ўрнига эса “ПСЖ”дан Хавьер Пасторе, “Аякс”дан Жастин Клюйверт, “Аталанта”дан Браян Кристанте тўлдирди. 2018-19-йилги мавсумда ушбу сезиларли ўзгаришлар билан асосий таркиб ҳам анча бошқача тус олиши муқаррар.

1-вариант

Ёзги трансфер бозори тугагунига қадар клуб яна бир муҳим футболчини олиб келиши мумкин. Агарда бу амалга ошмагана тақдирда ҳам “Рома” А Сериянинг энг кучли асосий таркибини ҳосил қилиши мумкин.

Алиссоннинг ўрнини “Болонья”дан олиб келинган фахрий посбон Миранте эгаллаши кутилмоқда. Унинг олдида эса тажрибали Манолас – Фасио жуфтлиги жой олади. Уларга қанотдан Коларов ва Флоренцилар камарбаста бўлишади.

Ярим ҳимояда эса афсонавий Даниеле Де Росси ва янги вакил Кристантелар эгаллайди. Улардан олдинда ҳужумкор футболчилардан энг номдори “ПСЖ”нинг собиқ вакили ва Италия футболига яхши таниш бўлган Пасторе етакчилик қилади. Эден Джекони қанотлардан Перотти ва Эл Шааравилар ёрдам беришади.

2-вариант

Римликларнинг трансфер нишонлари амалга ошадиган бўлса, Алиссонни Мундиал кашфиётчиси бўлган Олсен тўлдириши кутилмоқда. Швециялик посбон бразилиялик ҳамкасбининг ўрнини билдирмаслиги аниқ.

Ҳимоя чизиғига эса Маркано олиб келиниши кутилмоқда. Ярим ҳимояда Строотман Кристантега шериклик қилиши ҳам мумкин. Улардан олдинда Голландия афсонаси Патрик Клюйвертнинг ўғли Жастин чапдан, ўнг қанотдан эса Мальком ўйнаши варианти кутилган эди. Бироқ Мальком “Рома”ни танламади. Шундай бўлсада, “Олимпико”да кучли вингерлар етарлича топилади. Жуда бўлмаса, дунёнинг энг қиммат дарвозабони бўлган Алиссон трансферидан тушган пулни бирорта кучли футболчига сарфлашади.

3-вариант

Асосий таркиб рақобатчилик қилиш учун етарли бўлмаса, “Рома” ўзининг ёш иқтидор эгаларига суяниши мумкин. Улар бу борада Европада мақтанса арзигулик тарбияланувчилари ва вакилларига эга.

Бундай вариантда дарвозани ёш иқтидор эгаси Даниел Фусато эгаллаши мумкин. Ҳимояда эса яна бир янги ном Бианда ҳаракат қилиши кутилмоқда. 18 ёшли француз ҳимоячисини порлоқ келажак кутмоқда, дея бонг ураётганлар сони ортиб бормоқда.

Шунингдек, марказий ҳимоячиларга қанотлардан Карсдорп ва Люка Пеллегринилар ёрдам беришади. Ҳужумкор ярим ҳимоячилар – Клюйверт, Корич ва турк Женгиз Ундер эгаллаши мумкин.

Ҳужумда эса 2016-17-йилги мавсумда 11 гол урган Патрик Шик жавлон уриши мумкин. 22-ёшли ҳужумчи “Сампдория”да ўз маҳоратини етарлича тоблаб бўлган.

Кўриб турганимиздек, “Рома”да вариантлар етарлича. Улар бу таркиб билан сўнгги натижаларини янада яхшилашга уриниб кўришлари мумкин. Чемпионлик учун кучли таркиб бўлмасада, А Серия ва Чемпионлар Лигасида навбатдаги қаҳрамонликларни кўрстиб қўйишлари эҳтимолдан ҳоли эмас. Бу футбол, тўп думалоқ, майдон текис!

Эркинжон Ғайбуллаев тайёрлади