Роналду: Фаолиятимни "Реал"да якунлашни истайман, лекин...

Мадриднинг “Реал” клуби ҳужумчиси Криштиану Роналду кеча клублар ўртасидаги жаҳон чемпионатида эришилган ғалабадан сўнг ўзининг “қироллик клуби”даги келажаги ҳақида тўхталиб ўтди.

“Биз ушбу совринни қўлга киритишни истаган эдик ва олдинда бизни жиддий қарама-қаршилик кутаётганини ҳам билардик.

Зидан бизга “Реал” аввал ҳеч қачон бир йилда 5та соврин ютмаганини айтди ва биз шундан сўнг ўзимизда қўшимча куч ҳис қилдик. Якунда эса ғалаба қозондик.

Мен барчага майдоннинг ўзидаёқ жавоб бераман ва кўриб турганингиздек бугун ҳам жамоамнинг навбатдаги совринини қўлга киритишига ёрдам бердим.

Фаолиятимни “Реал”да якунлаш? Мен буни хоҳлардим. Аммо, бу фақат менгагина боғлиқ эмас. Мен жамоа хўжайини эмасман”, - дейди португалиялик футболчи.

Эслатиб ўтамиз, мусобақанинг финал учрашувида айнан Роналдунинг киритган ягона голи “Реал”га жаҳон чемпионлигини тақдим этган эди.