Роналду Месси ва Неймардан кўпроқ даромад топмоқчи

Мадриднинг “Реал” жамоаси ҳужумчиси Криштиану Роналду дунёдаги барча футболчилардаг кўпроқ даромад топишни истамоқда ва бу борада клуб президенти Флорентино Перес билан гаплашиб олмоқчи.

Marca нашрининг хабар беришича, португалиялик футболчи “Барселона”етакчиси Лионель Месси ва ПСЖ ҳужумчиси Неймардан камроқ маош олаётганини “ҳазм” қила олмаяпти. Месси каталонияликлар билан келишувни узайтиргач, йилига 50 млн евро маош оладиган бўлди.

Бешинчи бор “Олтин тўп”ни қўлга киритган Роналду эса янада кўпроғига лойиқ эканини ҳис қилмоқда ва маоши ошишига умид кўзи билан қарамоқда.  

32 ёшли футболчининг “Реал” билан шартномаси 2021 йилнинг ёзигача мўлжалланган. Бу эса Роналду 36 ёшига қадар “Қироллик клуби” шарафини ҳимоя қилади демакдир.