Рўзиқул Бердиев: Рақиб стандартлардан кўп гол ўтказишини билар эдик

Бугун ОЧЛ плей-офф босқичи доирасида Қаршининг “Насаф” клуби Иорданиянинг “Ал-Файсали” клубини 5:1 ҳисобида мағлуб этди ва гуруҳ босқичи йўлланмасига эга чиқди. Учрашувдан сўнг “аждарлар” устози Рўзиқул Бердиев баҳс тўғрисидаги ўз фикрлари билан ўртоқлашди.

“Аввалом бор, барча футбол ишқибозларини бугунги ғалаба билан табриклайман. Футбол байрами юртимизда давом этмоқда. Бевосита ўйинга тўхталадиган бўлсам, рақибимиз жуда жиддий эди. Биз уларни яхшилаб ўрганган эдик. Бугун қайсидир маънода омад ҳам биз томонда бўлди. Рақибимизни ўрганиш жараёнида стандарт вазиятлардан кўпроқ гол ўтказиб юборишига амин бўлдик. Бугунги ўйиндан олдин, ўйинчиларимизга шуни ҳам эътиборга олишларини айтгандик. Натижада дастлаб киритган иккита голимиз ҳам шундай вазиятларда киритилди. Бу голлар ўйин тақдирини ҳал қилди.

Осиё чемпиони бўлган футболчиларимиз билан кеча узоқ суҳбатлашдим. Натижада уларни майдонга туширишга, ўзимда ишонч ҳосил қилдим. Улар бугун ишоничмизни тўлиқ оқлашди.

Албатта таркибимизда етишмовчиликлар бор, аммо бизда таркибни кучайтириш учун имкон ҳам бор. Бу борада клубимиз президенти бизни қўллаб-қувватлаяпти. Бу имкониятдан фойдаланамиз”, – деб айтиб ўтди Рўзиқул Саъдуллаевич.