"Селтик" Шотландияда рекорд ўрнатди

Шотландия чемпионатида яққол пешқадамлик қилаётган “Селтик” клуби ички мусобақаларда мағлубиятсиз серия бўйича ҳам рекорд қайд этди.

Жорий ҳафта УЕФА Чемпионлар лигаси гуруҳ босқичининг илк турида ПСЖдан 0:5 ҳисобида мағлубиятга учраган Брендан Рожерс жамоаси Шотландия премьер-лигасининг навбатдаги турида “Росс Каунти” клубига (4:0) ҳеч қандай имконият қолдирмади. Ушбу ғалаба билан эса “Селтик” ўзининг чемпионат ва кубок баҳсларидаги мағлубиятсиз сериясини 55туга етказиб олди.

Маълумот учун, “Селтик” сўнгги бор 2016 йилнинг 11 май куни мағлубиятга учрашган. Ўшанда улар “Сент-Джонсон” клуби меҳмони бўлган ва 2:1 ҳисобида имкониятни бой бериб қўйишган эди.