Соареш учун курашга “Манчестер Сити” ҳам қўшилди

“Саутгемптон” клуби ҳимоячиси Седрик Соарешнинг ёзда жамоасини ўзгартириши тоборо ойдинлашиб бормоқда.

Аввалроқ португалиялик футболчининг хизматларига “Барселона” қизиқиш билдираётгани ҳақида хабар берган эдик. Евро-2016да ўзининг нималарга қодир эканлигини кўрсата олган Соарешни “Манчестер Сити” ҳам ўз сафида кўришни истамоқда. Ўз навбатида “Саутгемптон” Седрикнинг трансферидан 23 миллион евро даромад кўриши мумкин.

“Саутгемптон” президенти Ральф Крюгернинг сўзларига кўра жамоа бу ёзда ўз етакчиларини сотмайди. Аммо, футболчиларни шунчаки ушлаб туриш осон эмас.

Маълумот учун, “Саутгемптон” клуби сўнгги уч йилда Морган Шнайдерлин, Натаниэль Клайн, Садио Мане, Адам Лаллана, Виктор Ваньяма, Грациано Пелле, Жозе Фонте, Люк Шоу, Деян Ловрен ва Калум Чамберс каби футболчиларни сотган.